Bážii vuosttaš geardde guovžža

Guovža lea dakkár ealli man juohke bivdi háliidivččii báhčit, muitala Uula-Petteri Somby (29).

Uula-Petteri Somby

Uula-Petteri Somby ja su vuosttaš guovža.

Foto: Privat

Suoma bealde, Gámasmohkis bážii Uula-Petteri Somby (29) vuosttaš geardde iežas eallimis guovžža ikte.

– Mun ledjen doppe meahcis vázzimin ja áicen guovžža máŋga kilomehtera duohken. Riŋgegohten vehkiide, nu mii manaimet dohko ja mun báhčen dan guovžža, muitala 29-jahkásaš guovžabivdi.

– Mun báhčen dan 60 mehteris. Guovža finadii gal 20 mehter duohken, muhto mu albmás ii doaibman bissu. Gal váibmu vehá julkkii. In dieđe mo galggažan čilget, muhto speanta aŋkke jo lei.

Uula-Petteri Somby lea njuovvan guovža

Uula-Petteri Somby lea jo njuovvan guovža ja lea gearggus čiŋahit beaivelánja láhtti.

Foto: Privat

Ođđa čikŋa beaivelanjas

Guovžabivdu lea jo álgán Suomas ja dat leage bivdu masa máŋggas illudit.

– Bivdu lea nu somá ja speanta, ainjuo guovžabivdu. Guovža lea dakkár ealli maid juohkehaš gii bivdá háliidivččii beassat báhčit. Dat lea dakkár meahcceealli, man ii leat nu álki fidnet, muitala Uula-Petteri Somby guhte ieš bážii 70 kilosaš guovžža.

Somby lea jo fitnan njuovahagas njuovvamin guovžža ja son diehtá justa masa áigu guovžžanáhkki geavahit.

– Dál lea mus duollji biillas, áiggun dan ordnet dan láhkai ahte sáhtán láhttái bidjat beaivelatnjii.

Guovžabivdu

Sihke Suomas, Norggas ja Ruoŧas lea lohpi bivdit guovžža juohke čavčča, jus leat ohcan báhčinlobi.