Ruhtaváne åvdåsvásstádusá birra rijddali

Ruhtavádne, guoros fånda ja ilá ållo rudájt gålådam. Divtasvuona politihkkára dálla åvdåsvásstádusá birra rijddali.

Kommunestyret i Tysfjord

Divtasvuona politihkkára dálla åvdåsvásstádusá birra rijddali.

Foto: Sander Andersen / NRK

Ja rádeålmmå oadtju dáv suohkanpolitihkkáris gullat.

– Muv mielas ij la sån ietjas bargov dahkam, javllá Jan Einar Pedersen.

Valla Jan Ivar Jakobsen Aktisasjlistas, mij la suohkanstivra opposisjåvnån ij dási guorrasa, ja subtsas suohkanoajvve diedet budsjehta e duohtavuodav gåvvi juohkka bále gå budjehta giehtadaláduvvi.

– Jus sån dáv ij la suohkanstivrajn gullam, de la gåjt sån oadám.

Suohkanstivrra ja posisjåvnnå aj skuldov oadtju dán gássjelis dile diehti.

Gássjelis ájge

Jan Einar Pedersen

Suohkanpolitihkkár Jan Einar Pedersen ij la dudálasj rádeålmåj rádij.

Foto: Sander Andersen / NRK

Suohkanstivrrapolitihkkár Jan Einar Pedersen Doarespolitihkalasj belludagás (TPL) Divtasvuonan ij Divtasvuona rádeålmmåv árjo. Sivvan la stuorra iehpegållådibme ruhtalågon 2012 ja 2013, mij politihkkára mielas rádeålmmås dieddjiduváj.

– Tjoahkkáj lip 20-22 millijåvnå guoggot. Gåk galggap dajna nahkat? Dat de lulu nielgge moaddásijda. Mån dal vuordáv majt rádeålmmå dahká, ja mujna li dal ájádusá mij viertti dagáduvvat.

– Ij la bagádallam

Divtasvuodna sjattaj Robek-suohkanin vuoratjismáno dá jage. Suohkanpolitihkkár Pedersen ij ietjas åvdåsvásstádusáv vuorno politihkkárin, valla suv mielas viertti rádeålmmå sijáv bagádit.

– Sån la alemus háldadusoajvve mij mijáv galggá bagádallat nav vaj la vejulasj nanos mærrádusájt dahkat, ja muv mielas ij la dav dahkam.

Ja gå gatjádip jus la suv miella rádeålmmå vuosstáj iehpeluohtádusáv buktet , de náv vásstet.

– Dav de sidáv TPLajn dágástallat, ja de vuojnnep majt dahkap. Ja márjju buktep iehpeluohtádusáv.

– Dájos lájtto

Konrad Sætra

Konrad Sætran ælla plána hiejttet rádeålmmån.

Foto: Sander Andersen / NRK

Rádeålmåj Konrad Sætra ij suv åvdåsvásstádusáv hilgo ja tjielggi ienepgållådimev ruhtalågon li ássje man badjel sån i ráddi ja nav li gássjela diehtet, valla sån dættot politihkkárij åvdåsvásstádus la má mærrádusáj duogen.

– Duohta le gal suohkanin la ienepgållådibme ruhtalågon, valla lájtto la dádjot. Ij la dåhkkidahtte politihkkára ruhtadile åvdåsvásstádusás báhtari, ja dajs mærrádusájs majt suohkanstivrapolitihkkára vásstedi.

Ij iehpeluohtádusáv doarjo

Tor Asgeir Johansen

Suohkanoajvve Tor Asgeir Johansen ij iehpeluohtádusáv doarjo ietjas rádeålmmå vuosstáj.

Foto: Sander Andersen / NRK

Suohkanoajvve Tor Asgeir Johansen ij iehpeluohtádusáv doarjo ietjas rádeålmmå vuosstáj.

– Ælla miján sivá dav dálla dahkat.

Suohkanoajvve tjielggi ruhtavánesvuodav gå boadádallin, ja sån dættot suohkanpolitihkkárij åvdåsvásstádusáv.

– Suohkanstivran la åvdåsvásstádus, ruhtaháldadimes ja ietjá. Gå juojddá suohkanstivran la mierreduvvam de la ålles suohkanstivra åvdåsvásstádus.

– Posisjåvnå åvdåsvásstádus

Jan Ivar Jakobsen

Opposisjåvnå politihkkár Jan Ivar Jakobsena mielas la dát dille posisjåvnå åvdåsvásstádus.

Foto: Sander Andersen / NRK

Opposisjåvnå politihkkár Jan Ivar Jakobsen ij suohkanåjvijn guorrasa, ja suv mielas la dát posisjåvnå åvdåsvásstádus.

– Dábálattjat la ålles suohkanstivra åvdåsvásstádus gå juoga mierreduvvá. Valla dá bále galgav liehket duosstel ja javllat mån iv åvdåsvásstádusáv válde udnásjdile åvdås. Posisjåvnån la fábmo ja sij li dav buoragit adnám.

Jakobsen subtsas opposisjåvnnå la ietjá tjoavddusijt suohkanruhtadilláj oajvvadam, valla posisjåvnnå ællá sijáv gulldalam.

– Miján lij budsjæhttaj ietjama ævtodusá, valla posisjåvnnå jienastin mijá vuossti avtse jienaj gávtse jienaj vuossti.

– Ålles suohkanstivra åvdåsvásstádus

Suohkanoajvve Tor Asgeir Johansen tjuottjot opposisjåvnnå aj hæhttu åvdåsvásstádusáv válldet.

– Sij lij aj álmmugijs suohkanstivrraj válljiduvvam, ja dan diehti e sij máhte javllat sij e åvdåsvásstádusáv válde.

GEHTJA AJ ÆVTÁSJ TV-ÁSSJEV DÁN BIRRA:

Skiltet i rådhuset i Tysfjord