Ávžžuha olbmuid álbmotnággárvuhtii

Suoma sámedikkeáirras Aslak Holmberg Ohcejogas ávžžuha olbmuid álbmotnággárvuhtii ja guolástit nu gohččoduvvon stáhta čáziin golmma davimus gielddas. Stáhta eatnamiid ja čáziid hálddašeaddji Meahciráđđehus lea ovdal mieđihan nuvttá bivdolobiid davimus gielddaid olbmuide stáhta čáziide, muhto dál hálidit mávssu bivdolobis. – Dát ášši goit leamašan dán geasi oalle eahpečielggas ja olbmot galggašedje dál čájehit, ahte sii galget beassat bivdit nuvtta nugo ovdal, oaivvilda Holmberg.