Ávžžuha bohccobierggu addit juovlaskeaŋkan dán jagi

Juovllat lahkonit beaivvis beaivái ja olus leat jo smiehttagoahtán maid son juovlaskeaŋkan galggašii addit. Sámediggeráđis Silje Karine Muotkas lea erenomáš ávžžuhus sidjiide.

– Dál go mii olu gávppašit, de lea dehálaš doarjut báikkálaš fitnodagaid, ja lea maid hui buorre vuoruhit hui praktihkalaš ja dearvvašlaš skeaŋkkaid nugo earret eará bierggu, dat sáhttá leat bohccobiergu, dadjá Muotka.

Muotka muitala ahte goavvejagi geažil leat ollu boazosápmelaččat álggahan fitnodagaid ja ahte lea dehálaš sin doarjut.

– Dat lasiha gánnáhahttivuođa jus mii leat čeahpit geavahit daid báikkálaš biebmobuvttadeddjiid, dadjá Muotka

Muotkas lea nieida gii lea skuvllas Englánddas ja sávašii bierggu skeaŋkan.

– Son dieđusge váillaha ruovttu hirbmadit. Go jerren maid son sávvá juovlaskeaŋkan, de logai ahte sávvá goikebierggu. Dat liggii mu váimmu go lei nu buorre sávaldat, dadjá Muotka

• Loga maid: Badjel čuođi bohcco jápmán roasu geažil

Golbmasis jearran

Kárášjoga nisu Márjá Louise Sara gal láve skeŋket bohccobierggu juovlaskeaŋkan.

– Bohccobiergu lea dehálaš munnje, ja danin jurddašan ahte dat sáhttá illudahttit earáid geaidda ii soaitte seamma álki fidnet bierggu.

– Láven maiddai addit ruovttusráhkaduvvon sávtta mainna sáhttet návddašit bierggu. Lean ieš maid ožžon skeaŋkan bierggu, man goikadin ja bessen nu herskostallat de, dadjá Sara.

Eivind Yrjan Stamnes boahtá Tønsbergas ja muitala ahte son gal livččii hui ilus jus oččošii bohccobierggu juovlaskeaŋkan.

– Dat livččii skeaŋka, mii illudahtášii mu olu, erenoamážit go dat lea nu persovnnalaš skeaŋka ja čájeha fuolalašvuođa.

– Ieš gal in leat árvvoštallan skeŋket bohccobierggu, muhto dat gal lea várra danne go in láve juovlaskeaŋkkaid birra jurddašit ovdalgo loahpageahčen juovlamánu, bohkosa Stamnes.

Aina Madelén Nordsletta Aslaksen orru dál Skias ja ii leat goassege oastán bohccobierggu skeaŋkan muhto lea gal ožžon bierggu moddii skeaŋkan.

– Mu mielas lea buorre dan oažžut skeaŋkan, biergu han gal álo adno, ii ge leat diekkár skeaŋka maid ii gártta geavahit.

– Dál go orun máddin, de livččen sáhttán skeŋket bierggu skihpáriidda, sin mielas han orru nu eksohtalaš oažžut dan. Muhto de livččen gal maid várra ieš biddjon ráhkadit dan, leaikkastallá Nordsletta Aslaksen.

Biergobuvttadeaddji lea ilus

John Anders Sara eamidiinnis Karen Utsi Sarain doaimmaha Skodi Rein -fitnodaga ja lohkaba dán buori árvalussan.

– Lea issoras somá gullat ahte mis leat Sámedikkis áirasat, geat beroštit sámi ealáhusain, dadjá Sara.

Skodi Rein lea bearašfitnodat, mii lea jo spesialiseren goikebierggus ja buvttadit ollu iešguđetlágan goikebiergobuktagiid.

– Moai letne gávdnan juoidá, mainna háliidetne bargat, goikadit ja čájehit eambbo maid bohccobierggus sáhttá ráhkadit, dadjá Sara.

• Loga maid: Koronavirus čuohcá fitnodagaide Sámis
• Guldal maid: Turistafitnodat birgen bures koronadilis - Ođaspodda - NRK Radio

Čuvges boahtteáigi

Skodi Reinas leat jo olles leavttuin bargagoahtán juovllaid guvlui.

– Moai páhkkejetne juovlaskeaŋkkaid juohke beaivvi, dadjá Utsi Sara

Seammás illuda John Anders Sara čuvges boahtteáigái.

– Báikki olbmot leat čeahpit oastit ja diŋgojit ollu skeaŋkkaid mis, jáhkán ahte manná buoret guvlui min bealis dál, dadjá Sara.

Muotka muittuha maid olbmuid ahte biergovuovdima duohken lea ollu bargu.

– Lean jurddašan dan láhkai ahte lea hui dehálaš leat rehálaš maiddái go gávppaša ja respekteret daid hattiid. Lea olu bargu dan duohken ja lea hui fiinna gálvu vel dat biergu, loahpaha Muotka.