Ávžžuha ásahusaid geavahišgoahtit sámegiela

– Manne son sámegiella lea nu čihkosis Davviriikkain? Dan imaštallá Norgga árktalaš universitehta vuosttašamanueansa Torjer Olsen.

Forelesning av Torjer Olsen

Go Norggas leat guokte álbmoga, dážat ja sápmelaččat, de ásahusain lea maid ovddasvástádus geavahit sámegiela, vuosttašamanueansa Torjer Olsen oaivvilda.

Foto: Mariela Idivuoma/NRK

Alcces sus gal lea juo ođđa dáhpi go álggaha logaldallamiid universitehtastudeanttaide:

«Buorre iđit. Movt manná?»

Dál ođđa skuvlajagi olis Olsen lea mearridan álggahit buot iežas logaldallamiid sámegillii.

– Norggas leat guokte álbmoga

Torjer Olsen

Vuosttašamanuensa Torjer Olsen oaivvilda Norgga berret oahppat New Zealanddas.

Foto: Mariela Idivuoma/NRK

Son ávžžuha buot ásahusaid geavahit eanet sámegiela almmolaččat.

– Norggas leat guokte álbmoga, dážat ja sápmelaččat. Dan dihtii lea maid ovddasvástádus geavahit sámegiela eanet, lohká Torjer Olsen.

Ožžon inspirašuvnna New Zealanddas

Olsen lea ássan New Zealanddas jagi, gos álgoálbmotjoavku maoriijat ásset. Maoriijagiella lea lunddolaš oassi New Zealandda servvodagain. Dat lea movttáskahttán Olsena.

– Sin giella geavahuvvo eanáš oktavuođain. Nu galggašii maiddai Davviriikkain sámegiela ektui, Olsen oaivvilda.

Liiko ávžžuhussii

Anne Husebekk

Norgga árktalaš universitehta rektor, Anne Husebekk, doarju Torjer Olsena ávžžuhusa.

Foto: Jørn Inge Johansen / NRK

Norgga árktalaš universitehta rektor Anne Husebekk liiko Olsena ávžžuhusa.

– Doaivvun mu ge beassat geavahit sámegiela almmolaš dearvvahansártniid oktavuođas. Dan lean juo dahkan Romssa, Álttá, Narviika ja Harstad Campusaid mannan vahkus, Husebekk vástida.