Mannan čavčča vieččai Norgga álbmotmusea maŋŋá soađi huksejuvvon náveha ja viesu Porsáŋggus ja dolvo daid iežaset háldui Osloi.
Jagis 2019:s áigot daid ođđasit cegget Norgga álbmotmusea sadjái Bygdøyas. Ovdalgo dan dahket de áigot soapmásat musea bargiin idjadit dan sajis gosa visttit galget biddjot.
– Lea dehálaš gulahallat eatnanvuložiin dahje vuoiŋŋaiguin ovdalgo bidjagohtet maidege dan sadjái. Nu lohká Norgga álbmotmusea konserváhtor Birte Sandvik dan birra.
Dološ sámi jáhkku
Sápmelaččaid gaskkas lea leamaš dát okta dehálaš dahku ja Birte Sandvik lohká iežaset háliidit čájehit, ahte musea atná dán árbevieru árvvus.
Maiddái earát leat sin ávžžuhan dáinna lágiin bargat. Lea dehálaš ahte dan sájis, gosa bidjet viesu ja náveha, lea ráfi.
Sandvik lohká gullan mo lea geavvan jos huksejeaddjit eai leat jearran eatnanvuložiin dahje eará vuoiŋŋain lobi hukset.
– Sii geat ná leat bargan leat garrasit bártidan danin go leat badjelgeahččan dán árbevieru. Dan gal sii eai hálit vásihit, lohká Birte Sandvik.
Norgga álbmotmusea konserváhtor Birte Sandvik háliida maid ieš idjadit olgon dan sájis gosa sii áigut cegget maŋŋá soađi huksejuvvon viesu ja náveha maid sii leat viežžan Porsáŋggus.
– Buot luondduelemeanttain lea heagga dahje siellu
– Dát árbevierru vuolgá dološ jáhkus ahte buot luondduelemeanttain lea heaggá dahje siellu. Nu lohká Karen Elle Gaup, gii lea folklorista ja bargá Norgga álbmotmusea kulturhistorjjálaš ossodaga prošeaktajođiheaddjin.
– Go leat gávdnan saji gos háliidat idjadit de lea dehálaš gulahallat eatnanvuložiiguin dahje vuoiŋŋaiguin. Don čilget manin don dien sadjái leat boahtán ja man guhká don das háliidat orrut. Jos idjadettiin vásihat ráfi de han lea buot ortnegis muhto jos it bálle nohkat de fertet sirdit lávu dahje viesu, dadjá Káren Elle Gaup.
– Ii han olmmoš dárbbaš sirdit viesu áibbas eará sadjái. Lea doarvái dan dušše veaháš sirdit dahje jorgalit. Nie de soabadat singuin, lohká Karen Elle Gaup, gii bargá prošeaktajođiheaddjin Norgga Álbmotmusea kulturhistorjjálaš ossodagas ja eret Mieronis Guovdageainnu suohkanis.