NRK Meny
Normal

Ásahedje «Oslo Sámi Valáštallansearvvi»

Dát Oslo-ássi sámit váillahedje sierra sámi valáštallan- ja hárjehallanfálaldaga oaivegávpogis. Dasto álggahedje alcceseaset sámi valáštallansearvvi.

Stiftelsesmøtet hos Oslo Samiske Idrettslag

OLGOČOAHKKIN: Searvvi ásahedje Sofienberg-párkas, Oslos. Čoahkkimii ledje earret eará boahtan Roar Wigelius (gurut ravddas), Ingemund Skålnes, Hilje Stormo, Lásse Juhán Helander, Eirik Larsen, Stigo Holm, ja Issat-Erke Trosten.

Foto: Tor-Emil Schanche / NRK

– Vuosttaš ulbmil šaddá álggahit sis-bandy-joavkku, mii galgá oassálastit almmolaš ja vuolimuš divišuvnnas dáppe Oslo-guovllus čavčča rájes.

Dan lohká valáštallansearvvi vuosttaš jođiheaddji, Lásse Juhán Helander.

– Mii leat muhttinat geat leat guhkit áigge háliidan ásahit sámi valáštallansearvvi Oslo-sápmelaččaid várás. Ja gal dat varra lei áigi dál, lohká Helander.

Jođiheaddjin válljejuvvui son gieskat álggahančoahkkimis, mii lágiduvvui Sofienbergpárkas, Oslos.

Logis ledje boahtán olgočoahkkimii.

(Artihkal joatkašuvvá vuolábealde jiena)

Guldal jođiheaddji dás:

Dás muitala searvvi vuosttaš jođiheaddjin ásaheami duogáža.

Dás muitala searvvi vuosttaš jođiheaddji ásaheami duogáža.

– Bures boahtin, nieiddat

Vaikko dušše logis čoahkkimis, de lea Lásse Juhán Helander duhtavaš.

– Danin go dat leat gal eanet olbmot geat leat cealkán ahte servet searvái. Muhto eai sáhttán searvat čoahkkimii, go nu fáhkka bođii bovdehus.

– Dušše gánddat ledje gal čoahkkimis. Mo de?

– Jo, dat lea riekta. Muhto vuolimuš bandy-dásis ožžot sihke nissonolbmot ja almmáiolbmot leat seamma joavkkus. Nu ahte nieiddat leat bures boahtin searvat, fástida Helander.

Searvvi álggaheaddjit álget viehka fargga ohcat hárjehallanlanjaid ja –vejolašvuođaid.

Ii dušše bandy

Jođiheaddji Lásse Juhan Helander lohká ahte eai sii gáržžit fálaldaga dušše bandy hárrái.

– Lea beroštupmi dál álggus vuosttažettiin bandyi ja spábbačiekčamii. Muhto dat ii mearkkaš ahte eai galgga eará surggiin valáštallat. Oažžu vaikko sabetnjuikemii searvat min námas.

Hoahppu bábirbargguin

– Áigut earret eará ohcat miellahttuvuođa Norgga Valáštallanlihttui ja Norgga Bandylihttui. Hás eat vel norggabeale Sámi Valáštallanlihttui.

Áigemearri dieđihastit bandyjoavkku čakčii, lea beanta fargga. Danin buollái fáhkka hoahppu ásahit searvvi dál giđđat.

– Ja ruhtadeapmi šaddá maid dehálaš. Doaivumis ožžot muhttinat dieppe Sámedikkis mielde min searvvi álggaheami. Sámediggi goitge oažžu mis áiggi mielde ohcamuša, ja das maŋŋá lea dušše doaivut, muitala Oslo Sámi Valáštallansearvvi jođiheaddji loahpas.

Stiftelsesmøte i knallvær

Fiinna dálkkis ásahedje valáštallansearvvi. Dás oaidnit oasi čoahkkináirasiin; Ingemund Skålnes, Hilje Stormo ja jođiheaddji Lásse Juhán Helander.

Foto: Tor-Emil Schanche / NRK