NRK Meny
Normal

Ásaha Máilmmi álbmogiid universitehta

Máilmmi álgoálbmot alitoahppoásahusaid ovttasbargoorganisašuvdna WINHEC lágiduvvui mannan vahku loahpas jahkečoahkkima Hawaiija Oahu-sullos.

WINHEC bargojoavku

WINHEC bargojoavku evttoha ásahit Máilmmi álgoálbmogiid universitehta. Gurot bealde: Trevor J. Moeke, Amelia Crowfoot Clark, Turoa Royal ja Jan Henry Keskitalo.

Foto: Torkel Rasmussen / Sami Allaskuvla

Máilmmi álgoálbmot alitoahppoásahusaid ovttasbargoorganisašuvdna WINHEC lea jahkečoahkkimis Honolulus Hawaiijas mearridan ásahit Máilmmi álgoálbmot universitehta WINU. WINHEC njunuš jáhkká universitehtas leat duhát studeantta njealji jagi geažes.

Dohko oassálaste birrasiid 100 álgoálbmot dutki, alitoahppu jođiheaddji ja studeantta njealji máilmmi oasis. Guovddáš ášši WINHEC:a jahkečoahkkimis lei Máilmmi álgoálbmot universitehta WINU ásaheapmi.

Sámi akademihkar guovddážis


Okta guhte lea ges leamaš guovddáš rollas Máilmmi álgoálbmot universitehta plánemis lea Sámi allaskuvlla ovddeš rektor ja vuosttaš amanueansa Jan Henry Keskitalo.


- Máilmmi álgoálbmogiid alitoahpahusa ovttastus addá Máilmmi álgoálbmotuniversitehtii bargun ovddidit álgoálbmogiid giela ja kultuvrra ja eallinvuogi. Dát lea dat vuođđu man alde mii galget bargat. Nu ahte mii galget ovtta ládje sihkkarastit dan ahte dain fáttain maid miellahtut fállet lea buorre kvalitehta, muitala Keskitalo.

WINU galgá buktit kultuvrraid oktii


WINHEC jođiheaddji ja veahkesájadoalli Trevor J. Moeke Ođđa Selánddas muitala ahte Máilmmi álgoálbmotuniversitehta galgá addit friddjavuođa ja vejolašvuođaid eamiálbmogiidda birra máilmmi, nu ahte studeanttat ja jođiheaddjit besset ovddidit oahpahusa árbevirolaš vugiid ja álgoálbmot dieđu vai mii sáhtit oažžut ođđa buolvva dutkit geat ipmirdit iežaset vugiid.


Son muitala ahte praktihkalaččat dat meine dan ahte olbmot besset studeret ásahusain gos WINHEC buktá oktii eará dutkit ja eará servodagaid máilmmis. Dat dagaha dan ahte ođđa jođiheaddjit leat čeahpit iežaset dieđus ja ipmirdit maid earáid kultuvrraid.


Máilmmi álgoálbmot universiteahtta lea Trevor J. Moeke mielde buorre jurdda dannego stuorra oassi máilmmi ásahusain ii bálval álgoálbmotkultuvrraid, ja álgoálbmogat galget bargat iežaset ásahusain ja iežaset vugiiguin oahpahit álgoálbmotdieđu.

Duhát studeantta


Máilmmi álgoálbmot universitehta bargojoavkku lahttu Turoa Royal jáhkká ges álgoálbmot universitehtas njealji jagi geažes leat duhát studeantta geat bohtet miehtá álgoálbmot máilmmi. Dat livčče lohkamin buot dásiin álgooahpus gitta doavttirgráda dási rádjái.