NRK Meny
Normal

Árvvoštallet rievdadit lága

Eiseváldiin ii leat vejolašvuohta ráŋggáštit Kárášjoga gieldda mii lea rihkkon Norgga dearvvašvuođa ja fuolahusbálvaluslága. Dál árvvoštallet rievdadit lága.

Karasjok kommune
Foto: EWA-MARI HEDMAN

Eiseválddiid bealis eai leat vel vásihan ahte suohkan rihkku Norgga dearvvašvuođa ja fuolahusbálvaluslága, ja ii ge vástit go fylkkamánni ja Dearvvašvuođabearráigeahčču bivdet čilgehusa. Kárášjohka lea dat vuosttaš gielda mii dan lea dahkan, ja dál árvvoštallet eiseválddit rievdadit dán lága, go dál ii leat ráŋggáštusvejolašvuohta gielddaid ektui mat rihkkot lága.

Svein Holmestrand

Svein Holmestrand váiddii gieldda mearrádusa.

Foto: Ewa-Mari Hedman / NRK

Ášši álgá go Svein Holmestrand buohccái 2000:is. Son dárbbašišgođii veahki beaivválaš doaimmaide, veahkki man gielda fálai. Muhto go Holmestrand hágai biilla, de rievddai gieldda fálaldat.

Váiddii gieldda mearrádusa

Holmestrand váiddii gieldda mearrádusa muhto vástádus ii boahtan, ja go Holmestrand ohcalii dan, de oaččui vástádussan ahte su váidda lei sáddejuvvon fylkkamánnái. Filkamánni geahččalii moadde mánu oažžut oktavuođa gielddain, muhto eai sii ge ožžon vástádusa. Nu ferteje sáddet ášši Dearvvašvuođabearráigehččui. Go sii válde oktavuođa, de vástidii gielda ahte sis ii leat dilli meannudit ášši ovdalgo álggus borgemánu 2013s. Golggotmánu ii lean vel vástádus boahtán, ja Dearvvášvuođabearráigeahčču sáddii reivve gildii. Go ii boahtán vástádus, de oaččui sátnejođiheaddji seammá reivve. Muhto sus ii ge gullon mihkke.

Dearvvašvuođaministtar Bent Høie imáštallá gieldda meannudeami. Son ii loga iežas vel vásihan dákkár ášši, ja ahte politihkkálaš ovddasvástádus lea sátnejođiheaddjis ja gielddastivrras.

Muhto sátnejođiheaddji Anne Toril Eriksen Balto ii hálit vástidit moaitámuišaide, son lohkká ođđa ráđđeolbmá bargun vástidit. Ráđđeolmmái Elfrid Boine lohká olbmo gii lea váidán ožžon vástádusa, muhto mieđiha ahte sis lea leamašan váileváš áššmeannudeapmi dán áššis.

Departemeanttas leat dán ášši geažil geahčadeame šaddet go rievdadit lága vai eiseváldit sáhttet ráŋggašit suohkaniid mat eai čuovo lága. Høie mielas ii leat dohkálaš ná rihkkut lága.

  • Guldal ášši:
    Karasjoga gielda rihkkon laga