Árvvoštallet duoji suodjalit lágain

– Mun lean dan oaivilis ahte mii galgat reageret, geavahit daid juridihkalaš vugiid mat mis leat, lohká Sámeráđi prošeaktajođiheaddji Pia Nuorgam.

Olu jagiid lea juo sámiid beales cuiggoduvvon vierrásiid ávkkástallan sámi duojis. Earret eará leat ovdamearkkat dása Suomas mat eai leat sápmelaččaid miela mielde. Dán dilis dáhtošii Sámiráđđi dál beassat eret.

• Loga maid dárogillii: Vil ha regler for samisk duodji

Guhkká árvvoštallan lága geavahit

Duodjekonferánsii Kárášjogas, maid Sámediggi lágida dan olis go leat bargamen duodjedieđáhusain, leat čoahkkanan duojárat miehtá Sámi.

Duoji boahtteáiggis lea maid doppe sáhka, ja dasa oaivvilda ge Sámiráđđi geavahišgoahtit lága veahkkin. Sii leat olu jagiid juo bargan áššiin.

– Ulbmil juridihkalaš čovdosiin livčče eastadit daid vearrámus vugiid maid geavahit, eastadit sámi duoji vearrámus ávkkástallama, čilge Nuorgam.

– Kulturárbi áiton

Konferánssa logaldalli, Marie Kvernmo, govvida dán láhkai daid hástalusaid mat leat go duoji galggašii suodjalit:

– Jus dihto jovkkoš galggaš mearridit mii lea dohkálaš, de sáhttá nu geavvat ahte suodjalat iehčamet jámas. Nuppe dáfus sáhttá gis visot šaddat nu friddjan ahte ii leat šat dadjamuš iige vuoigatvuohta duodjái, lohká son.

– Fastti leat oaidnit

Árbevirolaš duodji gal rievddada, muhto duojára mielas lea eanemus unohas oaidnit mo vierrásat Suomas geahččalit sámi duoji geavahit oažžun dihte tietnasa.

– Na dat vigget datge ráhkadit seamma láhkai, muhto eai gal dat gal máhte, dat gal lea bilidan; romi vel leage dat biergasat ja biktasat maid cogget badjelasaset, lohká Máhte-Máret, Marit M.Anti, Kárášjogas, guhte eallenagi lea duddjon.

Vaikke vel vierrásat ležžet seahkanan bahá láhka duodjái, de ii loga duojár gal vávjit dan.

– Ii čuoza gal eará go ahte fasti lea oaidnit. Muhto diet ii čuoza mu doibmii. Mus lea dáppe iežan birrasis dat mu olbmot geaidda mun duddjon, lohká Máhte-Máret.

• Loga maid dárogillii: Korreks til finsk turistnæring