Filbmaárvvoštallan:
Sunna Nousuniemi filbma «Boso mu ruovttoluotta» lea muitalus filbmadahkki ja váldoolbmo Sunna iežas giččus ceavzit, maŋŋá go lea vásihan seksuála veahkaválddi.
Filbma čuovvu Sunna mátkki dan beaivái go son viimmat sáhttá geahččalit joatkit eallima.
Filbma rohtte geahčči álggus jo fárrui, go Nousuniemi litna jienain muitala dorvobáikkistis, mii lea johgáttis. Son čohkká doppe muohttagis. Olgun lea seavdnjat. Veahá guhkkeleappos oidnojit dálut, main leat čuovggat.
Luonddus orru leamen jaskat ja ráfálaš. Juohkehaš soaitá dárbbašit sierra báikki, gos gávdná sielu ráfi.
- Loga:
DORVOBÁIKI: Sunna Nousuniemi čohkká mielleravddas ja geahčada giláža, mii sutnje addá dorvvu.
Foto: Sunna NousuniemiJaskesvuohta ja ráfálašvuohta rihkkojuvvo go oaidnit Sunna čohkkámin biilla ovdapeaŋkkas. Son muitala makkár hástalusat sus leat eallimis.
«Mun dáistalan mu eallimis ovtta stuorra áššiin, ja dat ášši čuohcá olles mu eallimii. Mun lean vásihan trauma, man dihtii mun buhcen traumamaŋŋásaš streassasyndromain.»
Dát 24 minuktasaš filbma lea Sunna Nousuniemi persovnnalaš muitalus das, mo son rahčá nagadit eallit váivves jurdagiiguin ja balus maŋŋá traumáhtalaš dáhpáhusa.
Mii gullat mo manná su áššiin diggevuogádagas.
Filbma čájeha maid man mávssolaš lea gávdnat miellagiddevaš buđaldallama dahje áiggegolu go olbmos lea váttes dilli ja leat losses jurdagat.
Sunna stuorra buđaldallan lea duddjon. Son bossu dološ sámi duddjonárbevieru heggii. Dát gis lea mielde veahkeheamen su iežas eallima bossut ruovttoluotta heggii.
DÁLKKASLAŠ BUĐALDALLAN: Sunna Nousuniemi geahččá speadjalis ládjogahpira, man son ieš lea duddjon.
Foto: Sunna NousuniemiSunna Nousuniemi lea roahkkat go lea arvan ráhkadit dán filmma iežas eallima váivvimus ja losimus dáhpáhusas. Son muitala rahpasit ilgadis vásáhusas, mii fáhkka rievdadii virkos, nuorra nissonolbmo eallima.
Geahččin mus golget gatnjalat go Sunna hállá váivvimus ja seavdnjadeamos áššiin. Seammás illosan go filmmas oaidnit dakkár áššiin mat movttiidahttet su.
«Boso mu ruovttoluotta» lea bures ráhkaduvvon filbma. Govvejeaddjit nagadit geahčči diktit boahtit lahka Sunna Nousuniemi. Filmma jietna lea maid buorre.
Muitalus njuovžá bures álggus gitta lohppii ja doalaha geahčči das kinosáles.
Eanet aht` eanet sápmelaš nissonolbmot leat ráhkadišgoahtán sihke filmmaid ja dokumentáraid. Dát lea sámi servodahkii vuoitun.
Dalle gehččo máilbmi maiddái nissonolbmo čalmmiiguin ja eavttuiguin, iige dušše almmáiolbmo. Dát lea midjiide buohkaide ávkin.
«Boso mu ruovttoluotta» vuosttaščájálmas lea Tromssa Internationála Filbmafestiválas duorastaga eahkedis.
ALMMUHII POLITIIJAIDE: Dá boahtiba Sunna Nousuniemi ja su irgi politiijastašuvnnas, maŋŋá go leaba váidán rihkkosa. Ollugat eai arvva dieđihit dákkár rihkkosiid, go dovdet iežaset dego sivalažžan.
Foto: Pressebilde
