NRK Meny
Normal

Láddan Sofia

24-jahkásažžan lea Sofia Jannok ollu ovdánan ártistan. "Čeaskat" duođašta ahte son ánssáša saji sámi musihkkamáilmmis.

Sofia Jannok
Foto: Carl-Johan Utsi

Sofia Jannok lea sihke teakstačálli ja šuokŋadahkki eanaš lávlagiin iežas vuosttaš CDas. Ovtta lávlagii lea son heivehan Rauni Magga Lukkari teavstta, Georg Buljo lea ráhkadan šuoŋa golmma lávlagii, ja Iŋgor Ántte Áilu lea čállán sániid ja ráhkadan šuoŋa ovtta lávlagii.

Svein Schultz lea váldobuvttadeaddjin dán CDas. Schultz lea máŋggaid jagiid bargan eará sámi ártisttaiguin, earret eará Mari Boiniin, Ann Mari Anderseniin ja Johan Kittiin. Schultz ánssáša rámi das ahte juohke ártista oažžu sierranas jietnagova, ja danne sáhttá dadjat ahte Sofia Jannoka musihkka ii sulástahtte eará sámi ártisttaid geaiguin Schultz lea bargan ovdal.

Sámi Maria Mena

Sofia lávlu golmma lávlagis eŋgelasgillii, ja leat ge juste dat lávlagat mat dolvot mu jurdagiid beakkán norgga ártisttii Maria Menai. Soaitá ahte lávlunmálle juste diein lávlagiin dan dagaha. Jietnageavaheami sáhttá gohčodit "šuohkke-lávlumin". Diekkár šuohkkimii sáhttá dolkat, muhto nu ii leat go Sofia lávlu. Son lávlu dieinna lágiin juste dan mađe guhká ahte ii háhppet dasa dolkat.

Sofia buoret Anna haga

CDas "Čeaskat" ii leat mihkke mii muittuha duo Sofia & Anna. Dál leat lávlagiin eanet sánit ja luohti ii váldde nu stuora saji go ovdal. Sofia lea láddan ártistan Anna Kärrstedt haga. Jazzlágan musihkka orru leame dat musihkkamálle mii lea Sofia Jannoka váimmus, ja dat heive hui bures su jitnii. Dan gullá earenoamáš bures lávlagis "Mu moraš". Jazzamálliin beassá Sofia Jannok stoahkat lávlumiin, ja dainna son lihkostuvvá.

Sofia láddan duođaštuvvo su 2003 vuoitolávlagis "Liekkas". Lávlla lea ođamahttojuvvon dán cdas, ja Sofia lávlu dan áibbas earáládje ja buorebut go 4 jagi áigi Sámi Grand Prixas. Lávlun ja jietnageavaheapmi lea dál mihá buoret go ovdal.

Váivves "telefunjietna"

Dán cdas lea adnon teknihkka mii dahká ahte lávlu gullo dego livččii telefuvnnas, ja dat lea adnon oalle máŋgga sajis. Dán árvvoštalli mielas galggašii leat várrogas bidjat diekkár jiena, go dat sáhttá billistit eanet go buoridit. Moatti lávlagii gal heive bures, muhto sáhttá váibadahttit beallji jus adno beare dávjá.

Návddaš ja vuoiŋŋas

Lea hui buorre ahte "Čeaskat" ii ilbman dakka maŋŋel Sámi Grand Prix 2003. Dat njeallje jagi mat leat vássan dan rájes go Sofia Jannok vuittii diein gilvvuin, leat addán sutnje vejolašvuođa láddat ja gávdnat iežas geainnu musihkkamáilmmis. Danne duosttá dát árvvoštalli čuoččuhit ahte dá lea okta dain buoremus sámi cdain mat leat ilbman maŋemus jagiid. "Čeaskat" lea dat CD man vállje dalle go háliida návddašit musihka. Olmmoš duođai vuoiŋŋasta ii ge hohpohala go gullá Sofia Jannoka lávlume.