Filip Čubrilo ieš čuojaha sihke gitára, bássa ja piano. Son lohká iežas liikot sihke garra rockamusihkkii ja maiddái klassihkalaš musihkkii. Čubrilo jáhkká Sagittariusa ráhkadan cd masa Dream Theater joavkku berošteaddjit liikojit.
Sagittarius álggahuvvui 1989s ja joavkkus leat leamaš máŋga lávlu ja gitára- ja bássačuojaheaddji. Soai geat leaba olles áiggi leamaš joavkkus, leaba rumbučuojaheaddji Roy Aleksander Lind ja keyboardčuojaheaddji Per William Hermansen.
Joavkkus lea dál vuosttaš háve nissonlávlu, Stine Helene. Joavkku álggaheaddji Roy Aleksander Lind 16 jahkásaš bárdni Matz Lind lea joavkku ođđa gitáračuojaheaddji.
Min árvvoštalli Filip Čubrilo liiko ahte šuoŋat dán cd-as rievddadit ja eai leat oktageardánat. Muhtomin lea leahttu, ja de fáhkkestaga ii. Muhtomin lea garra deaddu, eará háviid geahppasit. Čubrilo dadjá ahte lea buorre go bihtát bisttet guhká. Dalle easka sáhttá musihkka návddášit.
Čubrilo maiddái liiko dasa ahte klassihkalaš málle seaguhuvvo Sagittariusa musihkkii. Son oaivvilda ahte klassihkalaš musihkka ja rocka lea vuogas ja čáppat seaguhit.
Čubriloi lea sámi musihkka vuos veahá amas, muhto son dadjá iežas vuohttit sámivuođa duokkot dákko "Noaidi" cdas. Lávlun muittuha su mielas juoigama, ja muhtun bihtáin gullá maiddái ahte omd. gitára dego juoigá.
Čubrilo dadjá ahte dá lea buorre cd sidjiide geat liikojit garra musihka nu go máilmmi beakkán Dream Theater joavkku. Ja go árvvoštalli bálkestii birccu Sagittarius ođđa cdii, dat čájehii viđeža.
