NRK Meny
Normal

Váilevaš dovddut

Guovttegear' Sámi Grand Prix vuoiti Johan Kitti lea almmuhan iežas vuosttaš cd. Sámi Radio árvvoštalli váillaha sániid mat duođaštivčče cd nama.

Johan Kitti
Foto: Anne Kitti, Christina Kuhmunen & Johan Kitti

"Dovddut" lea CD mas leat logi bihtá. Johan Kitti lea ieš čállán sihke sániid ja musihka eanaš šuoŋaide. Buvttadeaddjit leaba Herman Rundberg ja Svein Schultz.

Mihtilmas jietna

Johan Kitti dovdá álkit go vuos okte lea gullan su lávlume. Sus lea čuvges ja mihtilmas jietna. Árvvoštalli mielas lea Kitti jiena vuohkkaset gullat soames lávlagiin go earáin. Dat lávlagat main lea ollu el-gitára dahket ahte Kitti jietna veahá heavvana musihkkii, dego bihtás "Ráhkisvuohta".

Kitti jiena lea baicca vuohkkaset gullat go čuojahuvvo dábálaš kássagitárain. De maiddái vuhtto ahte lávlu ieš ii oro rahčamen alla nuohtaiguin go čuovvo kássagitára. 

Plagiere iežas? 

Guldalin máŋgii olles CDa. Golbma lávlaga gal dovden bures ovdalaččas. Dat leat dat golbma lávlaga maiguin Johan Kitti lea searvan Sámi Grand Priks gilvvuide. Okta dain, "Násttážan", lea dán árvvoštalli mielas okta Johan Kitti čábbámus lávlagiin.

Go áibbas ođđa cd ilbmá, de orui imaš ahte okta amas lávlla orui nu oahpis. Dego livččen dan gullan ovdal. Dárkilit guldalemiin fuomašin ahte lávlla "Unnoraš", lea sihke šuoŋa ja sániid dáfus oalle ovttalágan "Násttážan" lávlagiin.

Vearssat bistet sullii lihka guhkká, ja seammahat sániid gávdná goappaš lávlagis.

Dá "Unnoraš" lávlaga vuosttaš guokte linjjá; "Unna gieđažiid geahčadan mun, mojunjálmmid don bohkosat"

"Násttážan" lávlaga guovtti vuosttaš linjjás lea ges ná; "Ráhkisvuođain mun geahčadan du, mojunjálmmid don geasuhat mu"

Lea suddu jus Johan Kitti ráhkada eanet lávlagiid mat sulástahttet nubbi nuppi dáinna lágiin. Go Kitti lea čeahpes teakstačálli ja šuokŋadahkki. Plagieren lea heitot, muhto lea várra vel vearrát jus ártista ieš ráhkada "seammalágan" lávlagiid. 

Juoigan lea Kitti dovdomearka  

Johan Kitti orru gávdnan iežas dovdomearkka, ja dat lea ahte son juoigá juohke bihtás. Áidna lávlagat main II juoigga, leat dat guokte lávlaga maiguin álgobaliid searvvai Sámi Grand Priks gilvvuide. Dat sáhttá šaddat veahá láivvas, goit dán árvvoštalli mielas. 

Jus áigumuš lea ahte hálida dovdduid birra lávlut, de berrejit muhtun lávlagat sániiguin muitalit juoidá, ii dušše juoigamiin. Dat sáhttá ipmirduvvot dainna lágiin ahte luohti duokkot dákko galgá dego deavdit šuoŋa, danne go teaksta váilo.

Oastinveara

"Dovddut" lea dán CD namma, ja dat boktá máŋggalágan dovddu dán árvvoštallis.

Čoahkkáigeassu: Cdas lea nu go lea dábálaš muđui musihkkamáilmmis ge; Muhtun bihtáin lea leaktu ja mokta, earáin leat sihke guhkes ja ártegis álggut, mat orrot bistime beare guhká ovdal go albmaládje álget.

Muhto loahpalaččat; Dá lea buorre CD man áinnas gánnaha oastit. Ja ii dušše danne ahte dá lea okta moatti sámi cdas mat duollet dálle ilbmet. Muhto danne go das lea guldalanveara musihkka, man heive bures dohppet fárrui go vuolgá guhkit biilamátkái.