NRK Meny
Normal

Árvalan sihkastit oahppoplánas osiid mat gusket álgoálbmotvuoigatvuođaide

Ohppiidorganisašuvnna jođiheaddji Kristoffer Hansen lea árvalan sihkastit oahppoplánas osiid mat gusket álgoálbmotvuoigatvuođaide ja sápmelaččaid luonddugeavaheapmái. Dása ii liiko sámediggeráđi lahttu Silje Muotka ja bovdii Hansena davás. Odne deaivvadeaba soai Kárášjogas.

Kristoffer Hansen

Ohppiidorganisašuvnna jođiheaddji Kristoffer Hansen

Foto: Milana Knezevic / NRK

Nu čállá Ávvir .

Ovdal juovllaid dajai Ohppiidorganisašuvnna (OO) jođiheaddji Kristoffer Hansen Aftenposten-áviisii ahte Norgga oahppoplánat leat spagga dievva ja oaivvildii dain fertet muhtin ráje sihkkut eret . Hansen árvalii de sihkastit earret eará osiid mat gusket álgoálbmot vuoigatvuođaide ja sápmelaččaid luonddugeavaheapmái.

Silje Karine Muotka Sámedikkis

Sámediggeráđi lahttu Silje Karine Muotka

Foto: Carl-Gøran Larsson / NRK

Bovdii Kárášjohkii boahtit

Ohppiidorganisašuvnna jođiheaddji cealkámušat dagahedje digaštallamiid, ja sámediggeráđi lahttu Silje Karine Muotka lei okta sis guđet reagerejedje.

– Olusat lohket oahppoplánaid leat menddo dievvan, muhto fertet nannet sámi oahppoplánaid, eatge goaridit daid, lohká Muotka Ávvirii. Son bovdiige de Ohppiidorganisašuvnna jođiheaddji boahtit davás ja odne deaivvadeabage Muotka ja Hansen.

Sámediggeráđđelahttu Silje Karine Muotka muitala čoahkkimis šaddat sáhkan boahtteáiggi skuvllas. Dat lei ge vuolggasadji go Hansen logai oahppoplánaid leat beare dievva, ja leige maid okta konklušuvnnain maid Ludvigsen lávdegoddi diibmá ovdanbuvttii iežas guorahallamis boahtteáiggi skuvllaid birra.

Ain oaivvilda seamma

Hansen lohká iežas ain oaivvildit ahte oahppoplánas oččošii sihkastit osiid mat gusket álgoálbmotvuoigatvuođaide ja sápmelaččaid luonddugeavaheapmá:

– Jua dan gal dagan, muhto háliidan dadjat ahte jáhkán olusat lohke dien boastut. Mun in eisege oaivvil ahte skuvllain galget oahppat unnit sápmelaččaid birra, muhto jearan ahte leago dehálaš oahppat dieid áššiid birra dieid fágain dieid áiggiin, leago ovdamearkka dihte dárbu oahppat sámi luonddugeavaheami birra luonddufágas 8. luohkás, vai sáhttá go dáid áššiid birra oahppat eará ládje, čilge son Ávvirii.

Hansen ja Muotka leaba 8-áigge iđđes deaivvadan Leavnnja joatkkaskuvlla rektoriin ja ohppiidráđiin Leavnnjas, ovdalgp vuolgiba Kárášjohkii maŋŋil odne.