NRK Meny

Árvalan ođđa EU-šiehtadusa

Tuiskka forbundskansler Angela Merkel oaivvilda Eurohpá Uniovnna (EU) olahan muttolaš šiehtadusa Stuorra-Británniain.

Su mielas stáhtaministaris David Cameronas dál lea dakkár šiehtadus mainna sáhttá oažžut Stuorra-Británnia álbmoga guorrasit dasa ahte lea buoremus ahte sii ain leat mielde Uniovnnas.

Dat 28 EU-riikka mat guokte maŋimuš jándora leat šiehtadallan, leat ievttá maŋŋit eahkeda ovttajienalaččat miehtan sierra šiehtadusa Stuorra-Británniain.

Šiehtadusa geavatlaš sisdoallu almmuhuvvo easkka maŋŋá go stáhtaministtar David Cameron dan lea ovdanbuktán ráđđehussii otne.

Stuorra-Británnia álbmot galgá vuordimis geassemánus jienasteami bokte mearridit ahte galget go sii ain joatkit EU-miellahttun.