Olbmot davvi norggas leat eanemus mielas billistit luonddu bargosajiid ovddas. Dát surgeha Š-nuoraidmagasiinna váldodoaimmaheaddji Máret Ánne Sara, gii lea dolkan gullamis ákkastallama ahte maid mii galgat luondduin jus ii oktage áiggo orrut dáppe.
- Su gal veháš suhttađii ođas, man oinnii NRK neahttasiidduin dán áššiš.
Oaiviliskkadeapmi
Iskkádeapmi maid Infact lea dahkan NRK ovddas, čájeha ahte juohke goalmmát olmmoš Nordlánddas ja Romssas oaivvilda, ahte lea ortnegis billistit luonddu jus dat buktá bargosajiid. Finnmárkkus gis oaivvilda measta bealli álbmogis athe dát lea ortnegis
Š-nuoraidmagasiinna váldodoaimmaheaddji Máret Ánne Sara maid oaidná ahte Finnmárku dárbbaša bargosajiid, muhto son jáhkká ahte eai dušše bargosajit leat doarvái bisuhit olbmuid dáppe davvin.
- Ollu olbmot orrot jo dáppe Finnmárkkus ja luonduhan lea máŋgasii dat erenoamašvuohta, mii dáppe lea. Ja jus mii billisdat iežamet luondduresurššaid ja dahkat guovllu gávpoláganin, de gal lea seamma juo fárret muhtin eanet guovddášbáikái, mii soaitá leat vel lieggásut go dáppe.
Vejolaš čatnat oktii
Sara geassá ovdan ođđa entreprenevra-prošeavtta mii galgá álggahuvvot Barentsguovllus ja mas oahpahit nuoraid álggahit iežaset fitnodagaid mat doibmet giehtalagaid luondduealáhusaiguin. Su mielas lea dát čoavddus boahtteáigái.
- Dálle sii nágudivčče buorebut seailluhit dan mii dáppe lea ja geat juo orrot Finnmárkkus, de sii leat gergosat ieža háhkat bargosajiid, ja čovdosiid maiddái boahtteáigai.
GULDAL:
LOGA MAID: