Ráhkkaneamen AWG:i

Okta sin searvvis lea 15 jahkásaš Áslat Mihkkal Bals, gii galgá searaid iskat

čuoigangilvvuin. Áslat Mihkkal lea viššal hárjehallat, muhto čuoigat ii beasa nu dávjá go háliidivččii, muitala son.

– Guovdageainnus lea muhtomin beare buolaš, dadjá son.

Čuoigá, viehká ja čiekčá spáppa

Muđui gullá su hárjehallamii sihke viehkan ja spábbačiekčan. Dán vahkkoloahpa son oassálasttii Kárášjogas spábbačiekčangilvvuin.

Son illuda vuolgit Kalaallit Nunaatii .

– Dat gal šaddá hui somá - vuolgit dohko čuoigat olgoriikii.

– Manne?

– Na, čuoigat eará láhtus, iige leat dušše doppe Guovdageainnus dan seamma láhtu čuoigat birrat birra.

– Makkár boahtteáiggi mihttu lea dus čuoigamis?

– In mun leat gal dan boahtteáiggi jurddašan nu stuorrát, vuos. Dan ferte oaidnit, jus mannagoahtá buorebut, de gal lea dieđusge somá ja de gal oažžu jurddašišgoahtit ovddasguvlui.

Northug ovdagovvan

Áslat Mihkkal lea čuoiganhárjeheaddji haga, muhto ovdagovva ii váillo gal.

– Ovdagovva gal lea dieđusge Petter Northug, dat gal lea dat ovdagovva.

– Su leat oaidnán čuoigamin?

– Lean dieđusge, deattasta Áslat Mihkkal.

2000 gilvaleaddji nuora

Oktiibuot 2000 oassálasti, mat bohtet 9 guovllus, Álaska rájes Sápmái, galget gilvvohallat 14 gilvosuorggis Arktalaš dálveriemuin dahje Arctic Winter Games (AWG). Gilvvuin lea maid eará mávssolaš bealli, muitala sámi AWG joavkku jođiheaddji, Kåre Olli.

– Mun lean leamaš moddii mielde, in jođiheaddjin gal, muhto lean leamaš mielde váhnen namas ja mun oainnán dan beroštumi maid nuorat čájehit ja dan iešdovddu maid ožžot sámevuođas.

Vuoitoseremoniijat sáhttet jo beanta njuorasmahttit olbmo, dovddaha Olli.

– Muhtimin vuoitit ja go leat doppe vuoitojuohkimis ja go Sámisoga lávlla čuojahuvvo, de dovdo ahte dat iešdovdu badjána.

Gilvvohallan prográmma