NRK Meny
Normal

Árktalaš dálkkádatbarggut bisánit

Sámiráđi Árktalaš- ja Birasossodaga jođiheaddji ballá Amerihkká ođđa presideantta negatiivvalaččat váikkuhit árktalaš guovlluide.

Gunn-Britt Retter

Gunn-Britt Retter.

Foto: Nils Henrik Måsø / NRK

Donald Trump lea Amerihkká ođđa presideanta ja son ii jáhke ahte leat olbmot geat leat sivalačča go lea sáhka dálkkádatrievdamiid birra. Sámiráđi Árktalaš- ja Birasossodaga jođiheaddji Gunn-Britt Retter lohká ballat das mo Amerihkká ođđa presideanta ovddasguvlui áigu bargat go lea sáhka unnidit nuoskideami Árkatalaš guovlluin.

Illu nogai

Gunn-Britt Retter muitala ahte sii diibmá illudedje danin go Ovttastuvvan Naššuvnnaid dálkkádat konvenšuvnna oasseváldit čoahkkimis Parisas sohpe unnidit luoitit CO2 gassa áibmui. Mannan vahkkus sii ođđasit illudedje dan dihti go dalle han dát soahpamuš doaibmagođii muhto dál lea dilli rievdan ja ii leat šat diehttu mo dat ođđa Amerihkká presideanta áigu bargat dustet dálkkádat hástalusaid, lohká Sámiráđi Árktalaš- ja Birasossodaga jođiheaddji Gunn-Britt Retter.

Sápmelaččat suodjalit luonddu

Sámiráđi Árktalaš- ja Birasossodaga jođiheaddji Gunn-Britt Retter lohká čuovvut riikkaidgaskasaš proseassaid ja erenomážit Árktalaš ráđi ja Ovttastuvvan Naššuvnnaid konvenšuvnnaid. Retter lohká viggat riikkaidgaskasaččat muitalit mo sápmelaččat rahčet suodjalit luonddu ja daid riggodagaid mat doppe leat.