NRK Meny
Normal

Dološ govaid vuođul šattái gákti

Govaid ja girjjiid vuođul goarostii son Poršáŋggu gávtti. Dál veahkeha earáid geat háliidit gávtti oahppat goarrut.

Solveig Tangeraas

DUOJÁR: Solveig Tangeraas lea okta sis gii ozai dieđuid Poršáŋggu dološ gávtti birra.

Foto: Ellen Marianne Gaup / NRK

Poršáŋggus galggai Mearrasámi diehtoguovddáš rahppot Sámiid álbmotbeaivvi 2003´as. Solveig Tangeraas áiggui searvat doaluide, muhto ii diehtán maid galggai coggat.

De fuobmájedje son ja moattis earát ohcagoahtit dieđuid ahte lea go Poršáŋggus ovdal leamaš gákti. Sii lohke girjjiid, main ledje olu dieđut. Gákti ii gárvanan jur dáidda doaluide. Birrasiid guokte jagi ozai Solveig dieđuid Poršáŋggu gávtti birra, ovdal go goarostii gávtti. Dál lea son alcces gorron golbma gávtti.

Njuolgá go čielgi go gákti lea badjelis. Váccaša go olmmoš dalle earaládje?

– Dan in šat dieđe. Mun muittán ahte eadni lávii gávttiin vázzit, ii ge das lean šat dađi eambbo. Sáhttá fal leahkit ahte njuolgá veahá, vástida Solveig Tangeraas.

Dál eambbo ivnnit gávttiin

Dolin ii lean nu válljenvárri makkár ivdnái gákti galggai leat, čilge Tangeraas. Dalle gorro dan ávdnasis maid fidnejedje oastit. Dál go lea nu álki diŋgostit láđđi makkár ivnnis de fal háliida, de leat dieđus ge gávttiin eambbo ivnnit.

Oahpaha eará duojáriid

Dás Mearrasámi Duodjedálus, Billávuonas lea duojár Ingrid Berg oahppame gávtti goarrut. Son lea lávželuoktalaš, ja leage Sállanvuona gávtti goarrume.

Solveig Tangeraas ja Solveig Johannesen dat veahkeheaba Ingrid Berga goarrut gávtti čoahkkái. Olbmot lávejit sihtat sudno veahkkin goarrut.

Oahppame gávtti goarrut

OAHPAHEADDJI: Solveig Tangeraas da veahkeheame Ingrid Berga goarrut gávtti.

Foto: Ellen Marianne Gaup / NRK

Berg lea mánáidmánnái gávtti goarrume. Ieš gal nahkehii gávtti badjelii golbma jagi áigi, ja Solveig Tangeraas dat goarui dan sutnje. Son lea álo duddjon, ja dál beassá ge gávtti maid goarrut.

Máttuin ledje gávttit

Ingrid lea máŋga buolvva maŋás mannan ja fuobmán ahte su máttuin lei gákti. Govain oinnii ge makkár gákti galgá leat.

Ingrid Berg

SÁLLANVUONA GÁKTI: Dá Ingrid Berg čájeha iežas gávtti.

Foto: Ellen Marianne Gaup / NRK

Álggos go galggái nahkehit gávtti badjelii, de balai ahte maid stuora bearaš dadjá. Vuorrasit olbmuide lea váddásit dohkkehit ahte leat sápmelaččat, dáruiduhttiama geažil, dadjá Berg.

Dás gulat eambbo