Arctic Frontiers-direktevrra: – Mii leat árktalaš earráneamis
Otne rabai olgoriikaministtar Anniken Huitfeldt jahkásaš konferánssa «Arctic Frontiers» Romssas.
Dábálaččat lea Ruošša ja Ruošša ovddasteaddjit lunddolaš oassin konferánssas, muhto dán jagi illá leat ruoššabeale ovddasteaddjit.
Dát lei maid fáddán olgoriikaministtar Anniken Huitfeldt rahpansártnis.
– Mii fertet doalahit muhtin lágan oktavuođa Ruoššan, vai eastadivččiimet vearu ipmárdusaid čuožžilit. Mii fertet leat rahpasat ja vuorddehahtti láhkai leat, logai olgoriikaministtar sártnistis.
Maiddái Arctic Frontiers direktevra Anu Fredriksson čujuhii Ruošša beallái sártnistis.
Konferánsa lea báiki gos juhkkojit dieđut, máhttu ja dutkan árktalaš guovllu riikkaid gaskka.
Muhto Ruošša haga váilu oassi dán máhtus, muitalii direktevra.
– Mii leat dál árktalaš earus. Mis váilu bealli árktalaš guovllu dutkamis ja bealli árktalaš guovlluin, son muitalii.
Ruošša ovddasteaddjit eai lean bovdejuvvon konferánsii dán jagi.