– Mun in leat bárdni inge nieida, mun lean Ánne Risten

Her finner du saken på norsk

Ánne Risten Sara dovdet olu olbmot heargevuodjingilvvuid oktavuođas gos lea njunnošis leamaš ollu jagiid.

Son lea maid leamaš rabas iežas seksuálavuođa dáfus, muhto dál lea su mielas áigi ahte sámi servvodagas maid šaddá eanet rabasvuohta.

Háliida rabas ságastallama

Ahte duostat muitalit áššiid man birra lea nu jaskat Sámis, lea dehálaš Sarai.

– Mun lean riegádan nieidan. Mun in leat goassege dovdan iežan nieidan. Muhto in leat dovdan iežan bárdninge.

Diibmá borgemánus čuohpahii son eret iežas čiččiid ja dál dovdá iežas ollisin.

Son ii loga iežas lesban dahje heterofiilan, muhto deattuha ahte son lea son, Ánne Risten.

– Dá lea dakkár ášši mii mu mielas ii oidno, iige hubmojuvvo. Dál lea áigi!

Buktá doaivaga

Mannan vahku meannudiige Sámediggi ođđa dásseárvodieđáhusa, Sábme Jállu.

Dieđáhusas gieđahallet dásseárvvu sohkabeliid gaskkas,veahkaválddi eastadeami lagas oktavuođain, gierdavašvuohta olbmuide geain leat fuones doaibmanávccat, vaššucealkámušat ja vaššikriminalitehta, gierdevašvuođa iešguđet seksuálavuhtii ja veahkaválddi vuosttaldeami lagas oktavuođain.

Sámedikki mihttun leage ahte sámi servvodagas galget leat seamma vuoigatvuođat ja vejolašvuođat buohkain ja dát dieđáhus fátmmasta viidát.

Sámediggeáirasis Anne Henriette Niluhis leat stuora vuordámušat dán bargui ja jáhkká dás boahtit sierra doaimmaid, mat leat ávkkálaččat buot sámiide.

– Dat lea dehálaš ja dán dieđáhusas leat oasit, mat gusket juohke olbmui servvodagas, dadjá Nilut.

Son maid geassá earenoamážit ovdan LHBTIQ-olbmuid dili.

Seksuálavuođat

Dás lea sáhka seksuálavuođain ja gii don leat. Dieđáhusas daddjo ahte buohkain galget leat seammalágan vuoigatvuođat beroškeahttá seksuála sojus, sohkabealidentitehtas ja sohkabealilbmamis.

Ollu homofiillat ja lesbbat eai duostta rahpasit muitalit iežaset soju birra go ballet servodaga reakšuvnnain.

Dieđáhusas boahtá ovdan earret eará ahte lea ain guhkes geaidnu buoridit LHBTIQ-olbmuid árgabeaivvi.

Nilut čujuhage dutkamii, mii muitala ahte homofiillaid ja lesba olbmuid gaskkas leat ollugat geahččalan sorbmet iežaset.

– Rievttes geaidnu

Nilut oaidnáge dán barggu, maid Sámediggi dál lea bidjan johtui, rievttes geaidnun oažžut sámediggepolitihka mii ovddida dásseárvvu. Dás vuordá son doaimmaid das movt eastadit vealaheami.

Maiddái Sara deattuha man dehálaš dát bargu lea.

– Jua, dat gal lei dehálaš munnje ja lea maid hui buorre oaidnit dan ahte Sámediggi váldá bajás juste dáid áššiid ahte máilbmi ii leat nu go mii doaivut, čáhppat ja vielgat. Das leat ollu ivnnit.