Giellaberošteaddji Ánne Márjá Guttorm Graven ásahii Skábmamánu 2016:is Snapchat-konto maid gohčoda «Snaepmie». Go čilge mii dát konto lea, de son dadjá ahte lea «Johttisámegielat snapchat-konto».
Dat mearkkaša ahte konto johttá olbmos olbmui, gii de snáppe iežas árgabeaivvis.
Snápparat miehtá Sámis
Juohke vahkku lea sus ođđa snáppar, gii snáppe dan birra maid ieš háliida sámegillii.
Muhtomin lea Ánne Márjá ieš gii jearrá olbmuin ahte háliidit go sii snáppet, muhto eanaš háviid de leat geahččit geat ieža váldet oktavuođa ja jerret ahte eai go sii oaččo ovtta vahkku snáppet.
– Ja daid vahkkui gos okta snáppar ii leat aktiiva, de bohtet muinna dieđut gehččiin ahte «dieđatgo ahte dál ii snáppejuvvo», dadjá son.
Sámegiellaarena sosiála medias
Sus lea okta gáibádus dasa gii háliida snáppet, ahte sisdoallu berre leat sámegillii. Dán snáppa čuvvot olbmot miehtá Sámis ja leat iešguđetláganat giela ektui.
Dáppe leat olbmot geat hálddašit giela oalle bures, olbmot geat eai hálddaš nu bures ja maiddái olbmot geat leat oahppamin sámegiela.
– Dát lea dego sámegielat «latnja» interneahttamáilmmis, mii eanaš lea majoritehta gielaide, dadjá son. Dasa masa mun liikon buot buoremus, lea go nuorat eai bala das mo sii hállet ja čállet. Go dat han gullo dávjá ahte eai Facebook:i čále sámegillii, go dalle boahtá vel giellapolitiija, muitala son.
Ásaheames juo stuorra beroštupmi
Graven muitala NRK:i ahte go ásahii konto, de ledje oalle ollugat geat čuovvugohte snáppa. Dál, beannot jagi maŋŋel, de leat 900 olbmot geat leat geahččan ja ráhpan snáppaid.
– Mu mielas lea 900 buorre lohkku, go jurddaša ahte lea snáppa mii dušše geavahuvvo sámegillii, dádjá son.
Dán konto leat beakkálmasat maid geavahan, mii lea buktán oalle ollu čuvvojeddjiid. Nugo ovdamearkka dihte ISÁK-vokalista Ella Marie Hætta Isaksen.
Geavahan @snaepmie ovdal
Okta gii lea geavahan @snaepmie ovdal lea ártistta Ella Marie Hætta Isaksen. Son háliidii snáppet vuosttažettiin go oinnii dán stuorra vejolašvuohtan ovddidit maid son bargá. Isaksen dadjá maid ahte lea buorre vejolašvuohta earáide , geain ii leat sámegiella árgabeaivvis, oaidnit ja gullat sámegiela juohke beaivve.
– Mii fertet gávdnat eará vugiid mo seailluhit giela, ja Snaepmie bokte lea hui buorre gullat iešguđetge sámegielaid ja suopmaniid. Dat lea oalle álki go beassá telefovnna bokte gullat sámegiela, muitala Isaksen.
Go Ella lei mielde, de sus lei jearranboddu. Doppe besse geahččit jearrat sus maid háliidedje, ja son muitala ahte sus ledje máŋga somás ságastallamat eará olbmuiguin @snaepmie bokte.