NRK Meny
Normal

Ann-Maris buorre doaivva vuoitit

Topp 20 ovddeš prográmmajođiheaddji Nicholas Carlie lea stuorámus fávorihtta vuoitit bearjadaga Melodi Grand Prix oassefinála Stavangeris. Speallanfitnodat navdá šaddat hui rabas gilvvuid ja sápmelaš Ann-Mari Andersen lea njealjádin.

Ann-Mari Andersen
Foto: Fredik Arff/Dinamo / NRK

Speallanfitnodat Betsafe.com lea árvvoštallan dán jagi Melodi Grand Prix vuosttaš oassefinála oasseváldiid. Dát lágiduvvo bearjadaga Stavangeris.

Dán árvvoštallama mielde ii leat sápmelaš Ann-Mari Andersen eisege stuorámus fávorihtta, muhto sus lea liikká buorre oddsa dán gilvvus.

Ann-Mari njealjádin

Stuorámus fávorihtta beassat viidáset dáin musihkkagilvvuin lea Nicholas Carlie lávlagiin "Colliding". Oddsa dasa ahte son vuoittášii lea 1.55.

Nubbin lea Podium lávlagiin "Lystgass". Oddsa dasa ahte justa dát joavku vuoittášii lea 1.70.

Michelle Purvis lávlagiin "Baby don`t stop the music" lea goalmmádin. Oddsa dasa ahte son vuoittášii lea 2.50.

Oddsa dasa ahte Ann-Mari Andersen vuoittášii gilvvuid lávlagiin "Ándagassii" lea 3.20. Son leage njealjádin dán árvvoštallama mielde.

Gula Ann-Mari Andersen lávlaga

Unnimus doaivva vuoitit lea Tinkerbells lávlagiin "Hold on" ja Veronica Akselsen lávlagiin "Am I supposed to love again". Oddsa dasa ahte nubbi dán guovtti oasseváldis vuoittášii lea 4.00.

Podium ja Ann-Mari Andersen leat almmatge dat oasseválddit bearjadaga oassefinálas geaid oddsspeallit leat eanemusat speallan, dieđit Betsafe.com fitnodaga beales.

Grand Prix klubbas jáhkku

Norgga Grand Prix klubbas lea stuorra jáhkku Ann-Mari Andersen lávlagii.

- Mis Grand Prix klubbas gal lea stuorra jáhkku dán lávlagii. Mii navdit dan álkit beassat finálii. Dá lea dakkár lávlla mii ollugiid geasuha. Das lea vuogas šuokŋa. Suohtas gullat dan, go dá lea hirbmat fiinna lávlla. Nu lohká Norgga Grand Prix klubba presideanta Morten Thomassen.

Ann-Mari Andersen lohká ieš ahte son soaitá hirpmástuhttit.

Dáppe sáhtát gullat buot lávlagiid