Anára ovdagotti ságadoalli oaivvilda cealkámuš ovddasta buohkaid oainnu
Anára ovdagotti ságadoalli Jari Huotari oaivvilda, ahte gieldda cealkámuš sámediggelágas ovddasta buot gieldalaččaid oainnu, nu muitala Yle Sápmi.
Cealkámušas, man Anára gielda attii sámediggeláhkaevttohusas Riikabeivviid vuođđoláhkaváljagoddái, daddjui ahte buot sámeguovllu ássit galget oažžut seamma vuoigatvuođaid, iige sámiid vuoigatvuođaid leat dárbu vuhtiiváldit sierra.
Dát leage dagahan garra kritihkka ja olbmot leat maid čoaggigoahtán nammalistu, vai gielda geasašii cealkámuša ruovttoluotta.
Huotari deattuha, ahte gieldda cealkámuša válmmaštallanbargui leat beassan váikkuhit sihke ovdagoddi ja maid gielddastivrra ságadoallit.
– Mii eat ožžon ovttage cuigema cealkámušas ja dát leage de ovdagotti oaidnu. Gielda lea cealkán buot gieldalaččaid bealis. Jus dán cealkámušas mii nu lea sámiid vuostá, de dan ferte gal geahččat hui stuorra stuoridanláse čađa, lohká Huotari Yle Sápmái.