AN rijkajgasskasasj álggoálmmukbiejvve: – Dákkir aktisasj solidaritehttabiejve li ájnnasa
Uddni bårggemáno 9. biejve ávvudallá Aktidum Nasjåvnå (AN) rijkajgasskasasj álggoálmmukbiejvev.
Dán jage l 30 jage dat rájes gå álggoálmmukbiejvve ásaduváj. Ásadibme lij jagen 1994, værálda iemeálmmugij barggojuohkusa vuostasj tjåhkanime aktijvuodan.
Dán jage tjalmostahttá AN sierraláhkáj álggoálmmugijt gudi vilá iesjmiellusattja viessu harvvevuovdijn, gånnå muhtema vilá li oadtjum ráfen viessot ulmutjijs gudi nierbadi.
FN sihtá berustimev låggŋit daj hásstalusáj birra maj rahtji vaj rijbadin. Vuovddetjuollam, miehttsebuollem, biggim ja ietjá oablloma li nágin ájtojs álggoálmmukjuohkusijda.
Dát galggá dágástaláduvvat webináran mav AN uddni doallá.
– Sávav sámijda, ja gájkka værálda álggoálmmugijda, vuorbbe biejvijn. Dákkir aktisasj solidaritehttabiejve li ájnnasa, javllá suohkan- ja guovlloministar Erling Sande præssadiedádusán.
Rijkajgasskasasj álggoálmmukbiejvve la biejvve solidaritiehtav vuosedittjat ja værálda álggoálmmugijt ja sijá riektájt vieledit, tjállá departemænnta. Maŋemus lågev jage la moatten rijkajn duohtavuoda- ja semadimprosessa læhkám. Madin muhtem kommisjåvnå li vuododuvvam doaro ja rijdo maŋŋela, la duohtavuoda- ja semadimkommisjåvnnå Vuonan vuododuvvam guoradalátjit Vuona ietjas politihkav sámij vuoksjuj álggoálmmugin, ja nasjåvnålasj unneplågo guojnaj, vuona- ja miehttsesuobmelattja gáktuj.
Tjaktjaj galggá Stuorradigge rappårtåv giehtadallat.
– Nav gåk kommisjåvnnå iesj tsuojggi, de ij dåhkki semadimev mierredit, dat gájbbet aktisasj sidodav ålles sebrudagán. Ráddidus sihtá dájna prosessajn viehkedit, juohkusij siegen ma li vaháguvvam dárojduhttempolitihkas, javllá stáhtaráde.
