NRK Meny
Normal

Amas sánit baldet lohkki

Mánáide lea dehálaš lohkat girjjiid, muhto de leat nu ollu amas sánit muhtin mánáidgirjjiin ahte ollesolmmošge ii ádde, nu oaivvilda vánhen Áile Jávo.

Áile Jávo

Áile Jávo imašta manne sámegiel mánáidgirjjiin leat nu olu amas sánit. Lossa giela lohká goddit mánás lohkanmovtta.

Foto: Dan Robert Larsen / NRK

Áile Jávo lohká ahte mánáid girjjiin lea nu lossa giella ahte daid iiba áddege. Son dieđos ohcala čilgehusa amas sániide, ii dušše skuvllagirjjiin, muhto maiddái mánáid čáppagirjjálašvuođa girjjiin. Iežas muitala smávit mánáidgirjjis gávdnan 37 amas sáni, daid sániid eai gal sii sin ruovttas dovdan. Jávo lohká leat váivi go mánáide čállet nu lossadit ahte dát goddá mánáin lohkanmovtta.

Mánáide ferte čállit geasuheaddji gielain

Inga Ravna Eira

Ingá Rávná Eira lea girječálli, iežas lohká álo smiehttat makkár áhkosaččaide son čállá. Giella lea dehálaš, ja maiddái sisdoallu.

Foto: Tonje Bergmo / NRK

Girječálli Ingá Rávna Eira lea girječálli, ja son lea čállán mánáidgirjjiid. Son gal oaivvilda ahte mánáide galgá čállit nu ahte sii áddejit. Girjjis galgá leat gelddolaš sisdoallu, juoga mii boktá mánáid beroštit das maid lohket. Dattege galget maid mánáide hástalusat, danne fertešii čállit nu ahte mánná maiddái oahppá ođđa sániid. Ođđa sániid oahpahivččii vaikke nu ahte máŋit linnjás čilgesta sániiguin dan amas sánis.

Girjelágádusas dárkkistit giela ja oahpahit maid ođđa sániid

Daglig leder i Sapmi Park Jan Helge Soleng

Lágádushoavdá Jan Helge Soleng muitala iežaset nannosit árvvoštallat girjemánusiin sihke giela ja sisdoalu.

Foto: Ann Marita Eriksen

Davvi Girjji girjelágádusa jođiheaddji Jan Helge Soleng muitala iežaset vuđolaččat geahčahit čálliid teavsttaid giellačehpiide. Sis leat sierra giella- ja sisdoalločeahppit geat dárkkistit ahte teavsttat dollet dási. Giela ektui lohká dárkkisteaddjiid leat oalle dárkilat, ja dábálaččat sáddáge dalle ollu sáhka gielas, go sii árvvoštallet giehtacállosiid.

Soleng lea ovttaoaivilis vánhemiin, gii moaitá go leat nu olu amas sánit mánáidgirjjiin. Son lohká ahte mánáidgirjjid galgá čállit nu ahte heivejit jurddašuvvon ahkosaččaide, muhto sii fertejit maiddái smiehttat dan ahte mánáide galget oahpahit ođđa sániid. Mánáid sátneriggodaga sáhttá girjjálašvuođain lasihit.

Girjelágádusat dárbbašit almmustahttindoarjaga Sámedikkis

Børge Kjær (tv) og Arne Johan Turi håper at ballen går i det rette målet kommende sesong.

Arne Johan Turi olgešbealde govas, muitala Sámedikki dárkkistit nannosit lágáduskonsuleantta árvvoštallama go galget mearridit bidjet go ruđa almmustahttimii vai eai

Foto: Sander Andersen / NRK

Sámediggi dat mearrida bidjet go ruđa almmustahttit ođđa girjjiid vai eai. Sámedikki kulturossodaga seniorráđđeaddi Arne Johan Turi muitala ahte jos Sámediggi galgá juolludit buvttadandoarjaga de geahčadit sii girjelágádusa giella- ja sisdoallokonsuleanta árvvoštallama vuđolaččat. Sii árvvoštallet maid dan ahte lea go girjji teaksta nu ahte heive jurddašuvvon ahkosaččaide. Danne lea lágádus-konsuleantta árvvoštallan dehálaš vuođđun, go galget mearridit bidjet go ruđa girjji almmustahttimii vai eai.