NRK Sápmi galggá sámegielav nannit ja várjjalit.
– Gåktu dav buoremusát dahkap? Makkir vuorddemusá li julevsámijn mijá mediafálaldahkaj? Dav álmmugis hæhttup gatjádit, javllá direktørra NRK Sámen, Mona Solbakk.
Dajnas gåhttju NRK Sápmi álmmuktjåhkanibmáj uddni, duorastagá gulátjit majt álmmuk sihtá.
Álmmuktjåhkanibme l julevsáme guovdátjin Árranin, Ájluovtan, Divtasvuonan. Ælljatacoav besa bårråt kloahkka 19.30 rájes, ja álmmuktjåhkanibme álggá kloahkka 20.
– Ájnas la álmmugijn ságastit, javllá Solbakk.
Media rievddá
Mediaværált ålov la rievddam maŋemus jagijt, ja Facebook la sjaddam ájnnasamos sadje gånnå viesáda diedojt gávnni, tsuojggit NRK Sáme direktørra.
– Soajttá stuoráp hásstalusájt dálla iejvvip gå majt sáme media árabut li vásedam. Dálla hæhttup daj stuora viddnudagáj fággádit.