Almmuhit ođđa skearru beassášlávvordaga konsearttas

Beassášlávvordaga gilvvohallá vuos Johan Anders Bær Sámi Grand Prix-lávddis. Maŋŋil fállá ges áibbas ođđa CD-skearru konsearttas mii sus lea Báktehárjjis dan dihte go diibmá vuittii Sámi Grand Prix.

Johan Anders Bær ja Dronefolk

Tom Rudi Torjussen, Georg Buljo, Per Willy Aaserud ja Johan Ánde Bær leat gergosat ihttá CD-almmuhankonsertii

Foto: Åse Pulk/NRK
Åse Pulk
Journalist

Kárášjohkalaš Johan Ánde Bær lea dál Guovdageainnus hárjehallame ihttá konsertii maid beassá doallat Báktehárjjis go diibmá vuittii SGP juoiganoasi. Ovdal Konseartta lassin galgá maid searvat ihttá Sámi Grand Prixai.

Áiggošii fas vuoitit

– Mun áiggošin vuoitit dán jagi maid Sámi Grand Prixa, vai beasan vel okte doallat konseartta boahtte jagi. Kánske dalle maid boahtá ođđa skearru olggos, dan ii dieđe, reašká Bær.

Bær lea dovddus juoigi gii lea almmuhan máŋga CD-skearru, muhto son ii duhtan dušše boares luđiid ovdanbuktit konsearttas. Son válljii ráhkadit ođđa musihka konsertii. Ovttas Dronefolk-duoin almmuha maid de seammás ihttin ođđa CD-skearru, «Ritni». Dronefolk duos leaba Georg Buljo ja Tom Rudi Torjussen.

– Dat šattai dan láhkai ahte moai Georgain hálešteimme. Mun riŋgejin sutnje go dihten ahte mus galgá konsearta ja lohken ahte eatgo mii juo ráhkat ođđa skearru dassážii. Mii leat bargan skearruin dugnadas, eat leat ožžon, eatge ohcange, dasa doarjaga.

Soaitá vuosttaš golmma skearrus

Georg Buljo muitala ahte son lea muhtin jagiid áigi buvttadan CD-skearru Johan Ánde Bærain ja dan rájes leaba hupman ovttas ráhkadit fas CD-skearru.

– Muhto munnos lei miella earaládje dán skearru ráhkadit ja háliideimme involveret Tom Rudi Torjussen eanet, go munnos lea duo Dronefolk. Mii leat geahččaladdan materiála maid live, go leat leamaš muhtin konsearttat gávnnahan dihte movt dát doaibmá.

CD-skearrus leat luođit, mat leat ođđasit komponerejuvvon.

– Mis lea hui vuogas deaivvadeapmi luođi ja musihka gaskkas, muitala Bær.

Bær muitala ahte manai bures ráhkadit skearru oanehis áiggis go sus ledje gárvves materiálat dasa, ja livčče materiálat vel boahtte skearrui maid. Buljo maid duođašta ahte sis orru šaddame nubbe skearru, ja soaitá vel goalmmát skearru maid.

– Lea mannan nu bures ahte háliidit ráhkadit eanet. Jáhkán ahte dát lea álgu triologiijai, muhto gal dan oaidná. Mii goit ovttasbargat nu guhká go lea mis lea somá.

– Somá go nu olu gávttehasat

– Makkár vuordámušat leat go galgabehtet Báktehárjjis beassášlávvordaga doallat konseartta?

– Mun jáhkán ahte šaddá hui buorre, dan gulan dál juo go leat hárjehallan, lohká Bær, gii sávvá ahte gávttehasat devdet Báktehárjji.

Lea buorre go beassá Guovdageidnui vuolgit oaidnit olu gávttehasaid. Mun dieđán Guovdageainnus lea olu gávttehasat. Kárášjogas ges eai láve olu, ja dat lea suddu.

Maiddái Buljo illuda beassášlávvordaga konsertii.

– Mu mielas lea álo nu somá boahtit Guovdageidnui čuojahit. Mii deaivat goitge olu fiinna olbmuid ja mis šaddá somá fárrolaga. Sávan ahte olbmuin maid šaddá somá. Mii goit áigut dahkat maid mii sáhttit ráhkadit buori miellalági Báktehárjái.

Johan Ánde Bær ja Dronefolk-duo lassin lea konsearttas maid čuojaheaddjin Per Willy Aaserud, gii čuojaha trompehta ja keyboard. Dasa lassin galgá maid Svein Schultz leat lávddis konseartta oktavuođas.