NRK Meny
Normal

Almmi guossit

Dain guovlluin, Sohppara birrasis, leat áiggiid mielde máŋggat imaš dáhpáhusa leamaš. Okta dain dáhpáhuvai dás olgolis, Lávdnjiteanus bajásguvlui.Muhtumat leat eanet jáhkehahttit go iežát. Soames muitalus lea dakkárlágan maid vel olggut máilmmi olbmot nai atnet veara dutkat dárkileappo. Nu lea dát muitalus maid dál áiggun muitalit didjiide.

Jos geahččá albmái dálveeahkeda de báitet miljovnnaid mielde násttit, muhtun girkkis ja soames livká beare. Ollu leat jearaldagat dieđus, ja okta válde gažaldagain lea: Leago olmmošsohka okto vai leatgo almmi rávdda dobbelis earálágán – jos dadjá olbmot - mat golget miehtá ja guossástallet eatnanspáppa maid ein duos ja dás. Vai leago nu - dat leat min iežamet luonddu orrut ja dikšut mat huomáthaga ihtet ja soamis beassá vel sin oaidnit nai.

Mis lea leamaš okta duostilis olmmái, mii ii ballan duššiin, ja son lea beassan lahka, oaidnit, dovdat ja gullat dakkáriid mat eatnasat eai obba niegat ge. Sáhttá nu dieđus maid leahkit. Doppe leat earát mat leat oaidnán duon ja dán go leat golgan olgun, muhto eai duostta dahje viša muitalit baluin olbmot dahket bilkun sin.

Ná goit lea dainna muitalusain. Ja mon geahččalan geardut nu got vásiheaddji Nils-Duommá ieš lea muitalan dáhpáhusa birra dasa gii guldalan lea.

Nils-Duommá lei boazu- reaidnu mátkin muohta skohteriin dálvegirkkes beavvi, guovvamánu 27 beaivvi 1977. Son lei iđitbeaivvi vuolgán ruovttus Badje Sohpparis ja jur mohkkásan Lávdnjiteanus ealloravdda guvlui go dobbelis áicái njeallje olbmo vaddji, jođi jávrráža gáddeguora. Ii son dál álggus beroštan ila stuorrát dieid – nu daddjon turisttaid. Sullii 100 mettara sis son goit bisánasttii skohtera.

Dat ledje njeallje seamma ládje bivttastuvvon olbmo mat bohte njuolga su vuoste. Dat ledje hui olbmo lágánat, ruoná ruškes biktasat badjelasas.
Go dat fuomášedje su, lea Nils-Duommá muitalan, de dat mohkkasedje fáhkkestaga gurutbeallai sus eret. Gáddeguora manne moadde mettara ovdal de jávke. Jávke čalmmiid ovdan. Ii mearkage báhcán. Dat lea hirpmástahtti, go sáhtte láhppot nie.

Moadde sekundda mannjel jávkama de albmi dego bárrun duldii dakka báikkis. Dat lei sullii go hilladolla báhkki almmi ja doadjá dan doarggistahtti bárrun vai čalbmi ii beasa čađa vaikko leage čađačuovgi. De dat albme-duoldan loktanii ja girdái nuorttas guvlui. Lei sullii helikopter fárta ja nu Nils-Duommá sáhtii čuovvut girdima manu ovtta kilomettara goit.

Dat njealljása jávke juoga girdi sisa mii lei lahka ávnnas-lágán vuoján ja orui measta čađačuovgi . Nils-Duommán spiidedage čalmmit geahčadettiin. Dat diŋga maid son oinnii lea jorbbas , stuorat, gaskkal vihtta- ja guoktelogi mettara viiddis.
Nils-Duommá lei vissis diet njealljása manne dieinna imaš girdiin. Son lean maid vissis sin oidne su - vaikko son ii oaidnán sin dien fievrru siste.
Dat lei ivnnehis diet duoldi albmi.

Maŋŋel go lei ealu birastan de son bisánasttii fas ja ozai luottaid – muhto ii mihkke lean gávdnamis muohttagis das gos jávke.

De lea jearaldat vel nai – Mat diet ledje? Makkár girdinmašiidna diet lei?
Dutkit gohčodit UFO-olbmuid - Humánoiden - ja dat ihtet vaikko gos ja goas. Ja seammá ládje lea sin girdin mašiinnaiguin maiguin sin mátkkoštit.

Ii lean nu áigá go eananspábba lei almmi dáivaha guovddáš ja beaivi ja buot násttit jorggistedje eatnama birra. Ipmárdus lea eará dál ja astrofysihkkarat ohcet eallima álggu guhkkin olgolis min máilmmi, jeargga ja dieđu. Soames oaidná Humánaoidiid, soames ii. Mat ledje Sohppara olgolis, Lávdnjiteatnu gáttis, eat dieđe. Eat sáhte jearrat Nils-Duommás ge go son lea guođđán dán máilmmi.

Jus son lei ipmirdit geahččat dárkileappo de lei dáidit oaidnit buorebut ja bastit čilget eanet, muhto gii geš dan jáhkká olbmot galget jávkat ollát nie ja girdát juoinnat, lea Nils-Duommá čilgen UFO- dutkiide go leat jearahallan su máŋgii. Agis son muittii dien dáhpáhusa ovtta girkes dálvebeaivvi 1977.

Soitet Sohppar humánoidet ballán dahje ain lávostallat ja siiddastallat dies lahka Badje Sohppar gili, Lávdnjiteatnu gáttis. Váikko eai jietnat dahje čájet maidege ovdal de boahtá fas olmmoš mii gierdá ja duostá oaidnit sin.
Dáidá suohtas bargu dutnje boahtte dálvvi mannat iskame velgo leat amaš ja imaš guosseorohagat dies lahkosis. Na mon dajan beare: Jos don duosttat dan dahkat!