Jugešvuohta lea lassánan maiddái nuoraid gaskkas. 17 jahkásaš nieida gii maŋimuš jagi nuoraidskuvllas juhkagođii spriitta, duodašta ahte lea áibba dábálažžan šaddan ahte nuorat nuoraidskuvllasagis juo juhkagohtet álkohola.
Juhkagođii nuoraidskuvlla agis
Nieida váccii maŋimuš jagi nuoraidskuvllas go vuosttaš geardde jugai álkohola. Dan rájes juhkagođii son jámmádit, juohke vahkkoloahpa. Sus ledje dievva ovttaahkkásaš skihppárat geaiguin ovttas jugaid. Sii gávnnadedje guđetguimmiideaset ruovttuin, ná son lohká lean vuogas vuohkin oahpásmuvvat ođđa olbmuide.
Álggos somán ja de noađđin
Álkohola lea oassin servodagas ja beaivválaš eallimis. Dan fitne oasttit juohke báikkis ja olu gávppiin, muhto dađistaga go olmmoš návddaša álkohola dávjjit aht dávjjit, de darvána dasa. Nu šaddá álkohola noađđin.
Dohkkehit iežas lea álkoholisttan
Dávjá olmmoš illá dohkket iežas leat geavvan álkoholisttan. Muhto go de fuomášisgoahtá ahte olbmot garvigohtet su, moarsi, eamit dahje mánát doalahišgohtet iežaset eret sus gii juhkká, na de soaitá áddegoahttit ahte son jugešvuođáinnis baldá iežas lagamuččaid eret. Nuba geavváge oktovuhtii, go bearašdilli billašuvvá.
Vejolaš beassat álkoholafámus
Son gii lea beassan álkoholas ii daja iežas leamen leat moralisttan, go buohkat galget beassat juhkat nugo válljejit. Muhto dan beaivve go iđđedis gáibidišgoahttá viinni, de galgá olmmoš smiehttagoahtit, go dát čájáha man garrasit lea sorron álkoholii. Kárášjohkalaš Amund Johnskareng gii ieš leamaš dán dilis muitala iežas leat alkoholihkkárin.