NRK Meny
Normal

Sámerádio bokte oahppá sámegiela

Beannot jagis son oahpai sámegiela, dan son dagai sámerádio bokte. Málatvuomenieida, Berit Nymo, hálddaša máŋga giela ja lea dál mearridan ahte áigu maiddái álgit sámástit.

Berit Nymo

Berit Nymo (govas) lea giellaberošteaddji. Son lea guldalan sámerádio beannot jagi ja lea das oahppan sámegiela.

Foto: Máret Ingá Smuk

Nuorra Málatvuomi giellaberošteaddjis lea nana giellabeallji go oahpai sámegiela sámerádio guldaleami bokte. Sus lea stuorra beroštupmi sámegillii vaikko vel sus ii leat sámiduogáš.

Háiken Romssas Sis-Finnmárkui

Málatvuomis ii gullo sámegiella seamma olu go Sis-Finnmárkkus, danin Nymo Romssas Kárášjohkii. Doppe son beassá gullat ja hállat sámegiela beaivválaččat.

– Viimmat lean Sis-Finnmárkkus, dat lea hui buorre. Mun lean ilus go beasan hállat sámegillii in ge dušše rádios guldalit sámegiela. Jáhku mielde fárren deike, muitala Biret.

Dearvvahit

Berit Nymo guovlalii NRK Sámis. Dalle beasai son dearvvahit rádiobargiid geaid lea gullan dušše rádios. Dá buorástahttiba Ronald Pulkain.

Foto: Máret Ingá Smuk / NRK

Manin lea dus nu stuorra beroštupmi sámegillii?

– Mun lean oahpan eará gielaid go lean mátkošan miehtá máilmmi, muhto dál áiggun 100 proseantta sámegiela. Mu mielas lea dat nu dárkilis giella, eanet dárkil go dárogiella dahje eaŋgalašgiella. Sámegillii sáhtát čilget buorebut go eará gielain. Mus lea mihttu oahpat sámegiela ollásit, vástida Málatvuomi nieida.

Sámegiella lea addán munnje hui olu

Biret lea oahppan gielaid go lea johtán máilmmis, muhto dat ii lean sus mihttu dalle go álggii mátkkoštit. Maŋit áigge son lea easka fuomášan ahte giella lea oalle miellagiddevaš.

«Go álgen mátkkoštit de ii lean mu ulbmil gielaid oahpat, muhto moadde jagi maŋŋil de mun šadden giella-nerdan.»

Berit Nymo

Son hálla guhtta giela, dárogiela, eaŋgalasgiela, Indonesia-giela, spánskka-, ruošša- ja dál maiddái sámegiela. Gielat bohtet ávkin go finada olgoriikkas, muhto sámegiela ávkkástallá maiddái ruovtturiikkas.

– Sámegiella lea addán munnje hui olu, go lean váris de geavahan Sis-Romssa kártta mii lea sámegillii. Dat lea álkidan kárttalohkama, dál mun ádden mii doppe čuožžu. Mun ahte sámegiella eanet Sis-Romssas, Beardus ja Málatvuomis, muitala Biret.

Berit Nymo dearvvaha Irjan Balto

Berit Nymo beasai dearvvahit maiddái oahpes jiena, Irjan Balto, guhte fuolaha <<Dáppe Dál>> sáddaga. Dat lea okta dain rádiosáddagiin masa Nymo liiko buoremusat.

Foto: Máret Ingá Smuk / NRK

Deaivvadii iežas «giellaoahpaheddjiiguin»

– Lei veahá imaš ja erenoamáš dearvvahit NRK Sámi rádio bargiid. Mun dovddan sin jienaid, muhto in leat goassige oaidnán sin ámadajuid ovdal. Dat lei hui buorre vásáhus munnje beassat finadit dáppe NRK Sámis, lohká Berit Nymo.

Makkár sáddagiidda liikot buoremusat?

– Mun liikon hui bures «Dáppe Dál» ja «Buorre Iđit Sápmi» sáddagiidda, vástida son.