Badjel čuođi oassálasti árktalaš guovlluin deaivvadit «Indegenous Film Conference», Guovdageainnus. Fáddán lea earret eará nannet eamiálbmogiid filbmaealáhusa ja loktet dan internationála dássái.
– Jurdda konferánssain lea čohkket buot árktalaš guovllu filbmaealáhusa ovddasteddjiid. Nu dadjá lágideaddji, Internašunála Sámi filbmainstituhtta direktevra Anne Lajla Utsi.
Son muitala ahte lea dehálaš dákkár konferánssain beassat deaivvadit ja digaštallat. Sus lea doaivva ahte ovttasbargu sáhttá leat guovddáš čoavddan ahte lihkostuvvat.
– Mii fertet álgit geahččat árktalaš guovllu oktasaš guovlun, dat lea váldofáddán konferánssas.
Fámolaš olbmot čoahkkanit
Utsi mielas orru leamen nu ahte go ná ollu filbmafámut čoahkkanit, de lea dá dakkár fáddá masa lea stuorra beroštupmi. Son lea bargan garrasit ahte nagodit čohkket filbmaealáhusa guovddášolbmuid Sápmái.
– Earret eará de bohtet «European Film Acadamys», mii sulastahttá beakkán «Oscar acadamy». Olles stivra boahtá Guovdageidnui ja sii dollet stivračoahkkima doppe.
Ásahit ođđa filbmafoandda
– Mii áigut ásahit árktalaš filbmafoandda álgoálbmogiid ovttasbargoguimmiiguin Ruonáeatnamis, Kanádas ja Ruoššas, muitala Utsi.
Ruhtadit álgoálbmot filmmaid lea stuorra hástalus árktalaš guovlluin. Utsi sávvá ahte dát oktasaš filbmafoanda sáhttá dahkat álkibun buvttadit prošeavttaid dáin guovlluin.
– Ovdamearkka dihtii Ruonáeatnamis lea hui unnán ruhta álgoálbmotfilmmaid buvttadeami várás.
Utsi lohká ahte ásahit filbmafoandda lea lávki rievttes guvlui. Son sávvá ahte foanda stuorru dan dássái ahte nagodišgoahtá stuorát buvttademiid ruhtadit.
Balddonas filbmabargobádji
Ovdalgo konferánsa álgá gaskavahku, de leat guoktelot filbmadahkki čoahkkanan Guovdageidnui bargobadjái. Bargobájis áigot bargat filbmaideaiguin balddonasaid birra.
– Álgoálbmogiin leat nu olu muitalusat mat eai leat muitaluvvon ovdal. Nana árbevierru álgoálbmogiid gaskkas lea muitalit balddonasmuitalusaid, dadjá Ánne Lajla Utsi.
Beakkán filbmadahkki Nils Gaup dat jođiha bargobáji, ja doaivva lea ahte boahtteáiggis boahtá árktalaš guovlluid balddonasfilbma kinoi.
Olles konferánsaprográmma gávnnat dás: