Prošeavtta oktavuođas galget oasálastit ovddidit sin girjjálaš ja dáiddalaš diehtomielalašvuođa, ja háhkat čállifágalaš gelbbolašvuođa sámegilli.
Prošeaktajođiheaddji Piia Susanna Juuso lea dal ohcame ođđa sámi girječálliid prošektii mii bistá guokte jagi.
– Dát lea dakkár girječállinoahppu ja dat lea nuoraid várás ja dakkáriidda geat čállet sámegillii nuoraidgirjjiid. Ja deháleamos ulbmil dáinna prošeavttain lea oažžut sáminuoraid lohkkat girjjiid, románaid, noveallaid, divttaid ja teáhtergiehtačállosiid sámegillii, dadjá Juuso.
Oažžut nuoraid čálligoahtit sámegillii
Piia Susanna Juuso muitala ahte sii leat álggahan dákkár prošeavtta vai nuorat álget čállit girjjiid sámegillii.
– Sihke sámi dáiddaráđis ja maiddái Sámedikkis fuomášedje ahte sámi nuorain ii leat hirbmat olu girjjálašvuohta. Sámi nuorat eai loga nu hirbmat olu sámegillii, jus sii galget válljet makkár gillii galget lohkát, de sii válljejit váldogiela. Lea maiddái ulbmil ahte nuorat álget ieža čállit sámegillii, go nuorat han dihtet makkár girjjálašvuođa nuorat háliidit, muitala Juuso.
- Loga maid:
Ii oktage vel ohcan
Dál ii leat go moadde beaivvi vel ohcanáiggis ja Juuso muitala ahte ii oktage leat vel ohcan.
– Dál lea vel moadde beaivvi ohcanáiggis ja dál ii leat vel ii oktage ohcan. Muhto mun doaivvun ahte sápmelažžat sii leat dakkárat geat álo vurdet dan maŋemuš beaivái ja ahte sii dalle ohcet beassat sisa. Mii doaivut maid ahte nu oallugat ohcet go vejolaš, ja mii leat jurddašan ahte mii váldit sisa sullii 15 čálli sisa. Muhto jus bohtet eanet ohcamušat, de leat dat vel buoret, dadjá son.
Juuso muitala maid ahte sis ii leat ahkemearri.
– Mis ii leat rievtti mielde ahkemearri, buot nuorat ožžot ohcat ja rávesolbmot geat čállet nuoraid várás. Nu ahte mii eat gal leat gieldime ahte ii oktage sáhte ohcat ja mii ávžžuhit ahte buohkat geat háliidit čállit sámegillii girjjiid, ohcet. Ja lea vejolaš čállit Davvisámegillii, lullisámegillii ja julevsámegillii girjjiid, dadjá son.
- Guldal ášši: