Chris Nikolas Hermansen Sara riegádii nieidan, muhto son nuorran juo dovdagođii ahte ii heive eallit nieidan. Su mielas son ii heiven eará nieiddaid searvái, muhto ii heiven gal bártniid searváige go juo lei nieida.
Transseksuála
Maŋŋel go lei beassan dahje konfirmerejuvvon de ostii son dihtora. Ja interneahtas son ohcagođii dieđuid transseksuálavuođa birra. De son dego dáikkihii, Chris ipmirdišgođii ahte son ieš lea transseksuála.
– Mun ožžon "woaw" dovddu go lohken transsaid birra, čilgehus mii lei čállon transsaid birra heivii juste munnje, čilge Chris Nikolas dán vahku Studio Sápmi -prográmmas.
Nu álggii Chris Nikolasas guhkes proseassa, son áiggui šaddan bárdnin.
Chris Nikolas ja prográmmajođiheaddji Ronald Isaksen Pulk.
Foto: Tanja Linnea Eriksen Norbye / NRKEatni moraš
Muhto ovdalgo son nuppástuhttogoahtán bárdnin, de fertii vuos eadnásis muitalit mii dál lea geavvame. Ja sutnje gal lei lossat gullat ahte nieida lei rievdame bárdnin.
– Eadnái dat lei moraš, son dovddai ahte su nieida jámii. Ja ahte muhtun amas bárdni lei váldán su nieidda saji. Muhto mun dadjen eadnái ahte in leat jápmán, mun lean ain dat seamma lunddot olmmoš vaikko mus ii leat šat nieidda hápmi, muitala Chris Nikolas rahpasit.
Su eadni gal dohkkehii Chris Nikolasa mearrádusa, muhto sus lei okta sávaldat.
– Ovdalgo go álgen hormonaid váldit de sávai eadni ahte bádden moadde lávlaga maid lávejin lávlut, son háliidii mu ovddeš jiena dego muitun alcces, dadjá Chris Nikolas.
Ale jeara ovddeš nama
Dihtet go don ahte transseksuála olmmoš ii liiko jus don jearat mii su ovddeš namma lei ovdal nuppástuhttima.
– Dat soardá veaháš jus don jearat mu ovddeš nama. Manne dutnje lea dehálaš dan diehtit? Áidna mas don galggat beroštit lea mu dálá namas, čilge Chris Nikolas.
Geahča dán vahku Studio Sápmi dáppe.
Prográmma oidno maid tv:s mánnodaga NRK2:žis diibmu 1945.
Studio Sámi guossit dán vahkku, gurut ravddas: Ellen Anne Siri, Anna Høye Tollan, Ánnámáret Ensemble ja Chris Nikolas Hermansen Sara
Foto: Tanja Linnea Eriksen Norbye / NRK
