NRK Meny
Normal

Bargobeaivi, muhto goitge ávvudit

Guovdageainnus vuhtto márkanis ahte lea sámi álbmotbeaivi. Gávttehasat oidnostallet, muhto goitge lea dát ollugiidda dábáláš bargobeaivi - measta goit.

Direktør i ICR Anders Oskal sammen med besøk fra Kina.

Riikkaidgaskasaš boazodoalloguovddážis leat guhkilmas guossit, gitta Kiinnas boahtán. Jie Yan, Yuan Zhang, Xnefenf Lang ja Anders Oskal.

Foto: Oddbjørg Hætta Sara / NRK

Riikaidgaskasaš boazodoalloguovddážis, ICR:as, lea direktevra Anders Oskal čoahkkinasttimin kiinnálaš gussiidguin geat leat boahtán Genhe gávpogis. Doppe leat ásaheame kulturguovddáža ja musea gos maiddái boazoálbmogiid kultuvrrat galget čájehuvvot. ICR lea dán oktavuođas veahkkin sidjiide.

– Mii fertet bargat vaikko lea sámi álbmotbeaivi, muhto diehttelas čuovvut maiddái doaluid go geargat čoahkkimiin. Nu sii maiddái besset vásihit ávvudeami, muitala Anders Oskal.

Son boagusta ahte jus galggaše ávvudit buot máilmmi boazoálbmogiid beivviid, de livčče ávvudeami juohke beaivvi.

Measta dábálaš bargobeaivi

Produksjonen går sin gang i Venor.

Venor bargit leat barggus.

Foto: Oddbjørg Hætta Sara / NRK

Maiddái Venor fitnodagas leat olbmot barggus. Lávut fertejit gorrojuvvot vaikko lea ge sámi álbmotbeaivi. Goitge muitala Karen Marit Bæhr Bongo ahte gal son maid vuolgá maid doaluide, go skuvlamánát gerget iežaset doaluidguin.

Bátnedivššár Ann Kristine Sara Bongo lea maid doama doama bargame. Galggašii ollet mánáid doaluide, ja Báktehárjái gos dat almmolaš doalut leat. Son lohká iežaset juohke jagi bargat bealle beaivvi, vai bargit besset doaluid čuovvut.

Tannlegen er klar for feiring - snart

Bátnedoavttir Ann Kristine Bongo.

Foto: Oddbjørg Hætta Sara / NRK

– Lean giessan gápmagiid, ja dušše doavtterfráhka náhkehan. Gákti lea mielde, dan coggalan go vuolggán ávvudit.

Irene Turi lea fitnan bátnedoaktára luhtte. Son lohká bátnedoaktára juoiggastan sunnje go veallái bátnedoavtterstuolus. Sámi álbmotbeaivvi gudnin.

Jaskkadet go dábálaččat

Guovdageainnu suohkana vuostáiváldimis leaba Maja Hætta ja Kirsten Karen Gaup guovttá. Suohkanis oažžu friddja jus ohcá, muhto eaktun lea ahte oasálasttet doaluidguin. Lohkába gal unnit ringet telefuvnnaid go muđui.

Ikke så folksomt på servicetorget

Guovdageainnu suohkana vuostáiváldimis eai lean bálljo olbmot.

Foto: Oddbjørg Hætta Sara / NRK

– Dán háve lei mu vuorru báhcit deike, lea veaháš váddáset go lea telefuvnnavástidanvuorus, čilge Maja Hætta.

Ávviris gal ii leat jaskat. Sámi álbmotbeaivvi lea olu bargu. Olu doalut maid galgá gokčat. Ja ihtá aviisa galgá maid gárvánit. Váldodoaimmaheaddji Kari Lisbeth Hermansen lea maid doapmame.

Ávvir fyller 7 år

Ávvira váldodoaimmaheaddji Kari Lisbeth Hermansen.

Foto: Oddbjørg Hætta Sara / NRK

– Justte dál eat astta ávvudit, muhto leat dingon gáhku ja biepmu deike. Mii han ávvudit maiddái Ávvira čieža jagi beaivvi!