Dán jagáš finnmárkulaš ja davvi-norgalaš

Deatnulaš Ella Marie Hætta Isaksen (20) lei olbmuid jiellat jienasteamis dán jagáš davvi-norgalaš ja finnmárkulaš.

Ella Marie Hætta Isaksen

Ella Marie Hætta Isaksen (20) gilvvuhalai NRK TV-ráiddus eará artisttaid vuostá beassat Norgga loahpalaš guoimmuheaddjin.

ISÁK musihkkajoavkku lávlu Ella Marie vuittii Stjernekamp lávlungilvvu finála Adjágas luđiin «Ozan». Dáinna lágiin loktii Deanonieida luođi ja sámevuođa loktosii, mii mearkkašii olu 20-jahkásažžii.

– Dat lean mun, mu siskkimuš mun. Mun lean nu rámis iežan sámi duogážis. Mun dieđán ahte mii sámit eat leat doppe gos gálggašeimmet leat servvodagas, dan dihte go nu olusat ain heahpanaddet ja čihket sin sámi duogáža. Logai Isaksen go faskii vuoittu.

Nuorta-Finnmárkku násttit álbmoga jiellahat

Isaksen vuittii vuos bálkkašumi “Årets nordlending”, golbma beaivve maŋŋá jienastuvvui «Årets finnmarking».

– Lea somá go justa mun ožžon dán bálkkašumi. Lea maid somá bargat ođđa musihkain. Illudan čuojahit konsearttaid miehtá Norgga 2019s ISÁK ođđa šuoŋain, logai sámenieida Nordlys áviisii go vuittii «Årets Nordlending» bálkkašumi.

Nordlys áviisa lei guhte geige «Årets nordlending» bálkkašumi ja iFinnmark áviisa ges «Årets finnmarking». Áviissaid lohkkit jienastit ja mearridit vuoiti.

Bandet ISÁK

Ella Marie musihkkajoavku ISÁK čuojahii diibmá skábman Studio Sámis.

Foto: Tanja Linnea Eriksen Norbye / NRK

Muhto Ella Marie ii loga olbmuid muitit dáid bálkkašumiid agibeaivve.

Agnete Johnsen med sameflagg

Agnete Johnsen (24) maid oasálasttii Stjernekamp lávlungilvvus 2013s, muhto vuoittáhalai loahpagilvvus Silya Nymoen vuostá.

Foto: Kenneth Hætta / Frilans

– Dát lea okta máŋga bálkkašumiin maid olbmot eai muitte šat muhton áigge geahčin, muhto lea illudovdu justa dál, logai dán jagáš finnmárkulaš iFinnmark áviisii.

Lea Unjárgga lávlu Agnete Johnsen guhte lea vuoitán bálkkašumi «Årets finnmarking» eanemus gerddiid. Vuos The BlackSheeps joavkkuin 2008s, dasto vuittii iežas namain 2012s ja 2014s. The BlackSheeps vuittii maid bálkkašumi «Årets nordlending» 2008s.