Dát lei fáddán go 8 boraspireguovllu (Finnmárkku ja Romssa fylkkaid) boraspirelávdegotti ovddasteaddjt deaivvadedje eanandoalloministariin ja dálkkát- ja birasministariin dán vahku álggus. Boraspirelávdegotti jođiheaddji, John Roald Karlsen, muitala ahte dutkan lea duođaštan ahte geatki dat speadjá buot eanemus ja albbas borra ráppiid maŋŋá go geatki lea bohccuid goddán.
Luondduhálddašandirektoráhtta doarju
John Roald Karlsen lohka miellagiddevažžan dan go luondduhálddašandirektoráhta dál čuovvolan si ja leat hupmagoahtán sirdit albasiid eará guovlluide.
Áidna mii guozaha dán áigumuša lea dat go Stuorradiggi ii leat vel ollen digaštallat das man olu boraspiret Norggas galget leat, dadjá Karlsen.
Dát mearkkaša dan, ahte dálá lohkku bisuhuvvo. Son mieđiha ahte albasiid sirdin davimus boraspireguovllus nubbái, sáhttá dagahit váttisvuođaid dan guvlui gosa albasat sirdojuvvojit.
Stuorimus boazodoalloguovlu
Karlsen muittuha ahte Romssa ja Finnmárkku boraspireguovlu lea Norgga stuorimus boazodoalloguovlu, gos 80% norgga boazodoalus lea. Danin ii dagahivčče seamma váttisvuođaid sirdit eará boraspireguovlluide davvin eret, dadjá John Roald Karlsen.