Háliidit olahit fuomášumi «risttalaš lávlagiin»

Corona-dávdda geažil lei rádji man galle olbmo besse Máze girkui dán sotnabeaivvi borgemánu 23 beaivvi beannot jagi áigi.

Konfirmánttat čohkkádedje vuosttaš beaŋkkas báhpa ja dulkka ovddabealde. Ipmilbálvalus rávdnjejuvvui Youtube-kanálas.

Sárdni maid Guovdageainnu ovddeš suohkanbáhppa, Bjarne Gustad, doalai šattai dovddusin miehtá riika.

Gustad earet eará deattuhii sártnis ahte abortta lea suddu, furrošeapmi dan seammá. Son maid geažuhii garrasit sártnis ahte nissonolmmoš dávjá lea sivalaš furrošemiide.

Les også Sokneprest fratatt ansvaret for konfirmantene etter omstridt preken: – Det er jo ydmykende

«Áivan» rapjoavku mearridii dakkaviđe ahte dás mii fertet ráhkadit šuoŋa. Dál lea «Oskku vieljat» nammasaš šuokŋa almmuhuvvon.

- Mii liikot ráhkadit šuoŋaid áššiid birra mat ožžot stuora fuomašumi servodagas, ja mii háliidit šuoŋain oažžut olbmuid jurdilit veaháš.

- Mii dohkkehit ahte olbmot dulkojit musihka iešguđet ge ládje. Muhto min áigumuš ii leat ciellat dahje suhttadit ovttage dáinna šuoŋain.

– Earet eará lávlubehtet «it galgga furrošit, guldal ipmilsáni». Lehpet go leaikkastallame ipmilsániin vai lea go dát risttalaš lávlla?

– Dan gal oažžu guldaleaddji ieš dulkot, vástida lávlu Isak Ailo Gaup Vars.

Mii daddjui sártnis

Maŋŋel go lei suhtadan olu olbmuid ja bullehan garra digaštallama iežas sártniin, de ráŋggáštii bisma su.

Gustad ii šat beassan oahpahit konfirmánttaid.

Les også Bisma ráŋgu su – ii šat oaččo oahpahit konfirmánttaid

Dál ii leat Bjarne Gustad šat báhppan Guovdageainnus, son lea bargagoahtán Sáme miššuvnna ovddas.

• Manne suhttadii sárdni olbmuid? Video:as oainnat oasážiid sártnis:

Muhto ledje maid olbmot geat dorjo Bjarne Gustad, dan sáhtii oaidnit sosiála mediain, nugo Facebookas.

Sii geat dorjo oaivvildedje ahte Gustad sárdnu nu movt ipmilsánis daddjo.

Ja go Bjarne Gustad almmuhii ahte heaitá suohkanbáhppan Guovdageainnus, de čálle máŋgasat ahte lei stuora vahágiin Guovdageainnu servodahkii go masse su báhppan.

Jearran lobi

Ovdalgo «Áivan» ráhkadišgođii šuoŋa dan beakkán sártni birra, de sii jerre lobi Bjarne Gustad:as.

– Dat lei stuora dáhpáhus midjiide go Bjarne suovai atnit oasážit su sártnis min šuoŋas «Oskku vielljat». Dat lei midjiide dego «prestens velsignelse», muitala Isak Ailo Gaup Vars.

– Lea go dát dakkár šuokŋa mainna Bjarne Gustad oažžu leat rámis?

– Na dan in dieđe, muhto jus fal lea mihkkege masá ii liiko gal mii ja Bjarne sáhttit ságastallat dan birra. Dát lea dušše dáidda, ja na lea min vuohki ráhkadit musihka.

Dás gulat šuoŋa mas Bjarne Gustad sárdni lea oassin:

Ožžot leaikkastallat

Go NRK váldá oktavuođa Bjarne Gustad:ain, de son bohkosa go gullá ahte su sártnis lea ráhkaduvvon lávlla. Son gal ieš ii leat gullan šuoŋa.

Sutnje lea dehálaš duosttat leaikkastallat buot lágan áššiiguin go beare fal ii šatta beare roavis.

- Mus gal lea humor ja suovan leaikkastallat iežainiin. Go fal beare ii leat snoallan ja badjelmearalaš.

- Daján dego dánskka poehta, Piet Hein: «Den som kun tar spøk for spøk, og alvor kun alvorlig.  Han og hun har faktisk oppfattet begge deler dårlig.»

Isak Ailo gal áinnas háliidivčče oaidnit Bjarne Gustad iežaset konsearttas guhkesbearjadaga Guovdageainnus.

– Mun ieš mávssán Bjarne bileahta ovddas.

Ovddeš suohkanbáhppa boagusta go gullá ahte «Áivan» háliida su bovdet konsertii.

– Mun dađibahábut in ástta, mus leat moadde ipmilbálvalusa maid galggan lágidit beassáš-vahkku, vástida Bjarne Gustad.

Urbi

Nyheter og innhold om samisk musikk