NRK Meny
Normal

Aina sávašii ahte su eadni livččii dearvvas

Aina stuorámus sávaldat lea ahte su eadni nagodivččii vázzit fas. Dalle sáhtášii eadni vuolgit su mielde vázzit, sihkkelastit, čuoigat, mearkut ja oaggut. Maiddái iežas máná latnjii, mii lea nuppi gearddis, livččii sáhttit mannat jus mat dearvvaš livččii.

Aina ja su áhčči Johan A Anti

Aina ja su áhčči Johan Anti.

Foto: Heidi Sara / NRK

Ainai ii leat dat mihkkige diehttalasaid ahte eadni bassaladdá ja málesta. Dávjá lea Aina gii dan dahká. Go áhčči ii leat ealu luhtte, de son veahkeha Aina.

Dávda hehtte su bargat árgabeaivválaš bargguid

Aina eatnis Monicas lea MS-dávda. Dat dahká ahte rumaš ii jeagat oaivvi ja danin ii nagot vázzit galle lávkki. Fámut ja deahkit nohket, mii maid dahká ahte ii leat álki bissut čuoččat.

Heajos oamedovdu

Son gárttai ovtta áigge juvlastuolus čohkkát go dávda lei hui vearrái. Dát dávda hehtte su dahkamis olu árgabeaibargguid ja dat de dagaha ahte sus dávjá lea heajos oamedovdu Aina ja bearraša hárrái go ii nákce nu olu.

Aina gal áinnas veahkeha eatnis, muhto mángii hálidivččii dušše leat 7-jahkásaš nieiddaš; Stoahkat, skihpáriiguin ovttastallat, buđaldit lanjas ja iige dárbbašit smiehttat maidige eará.

Aina liiko oaggut ja dahká dan dávjá geaseáigge. Dalle beassá veaháš bosihit ja bottu váldit árgabeaivve hástalusain.

Aina ja su eadni Moinca dollagáttis

Aina ja su eadni dollagáttis. Eadni Monica ferte báhcit dasa čohkkát go nieida vuolgá johkagáddái oaggut.

Aina eadni Monica lea dál ožžon dieđu ahte sáhttá Ruoššas divššu oažžut, muhto dat máksá olu. Bearaš lea čoaggigoahtán ruđa sosiála mediaid bokte vai Monica suittášii váldit vuostá dán saji.

Aina maid hálidivččii dahkat juoidá vai su eadni Monica dearvvasmuvašii, muhto maid?

Aina ja su eadni Monica

Aina skeŋke iežas eatnái Monicai ruđa vai eadni beassá vuolgit dikššui

Foto: Heidi Sara / NRK