NRK Meny
Normal

Ailu Valle radiokonsearta

Dán vahkku lea suoma sámi rappara Ailu Valle konsearta man fállat diibmosaš sáddagis. Valle finai Studio Sámis skábmamánus diibmá, ovttas Trio Boogiemen joavkkuin.

Studio Sápmi, nov. 2014. Foto: Lemet Ailo Holmestrand Hætta

Govva: Lemet Ailo Holmestrand Hætta

Odne diibmu 16.30 sáhtát rádios gullat Ailu Valle konseartta, mii báddejuvvui Kárášjogas ovdalaš juovllaid.

Ailu Valle čállá ieš lávlagiidis, ja oaivvilda ahte rapmusihka bokte sáhttá oahpahit giela daidda nuoraide geat rahčet skuvllas. Dat geasuha eanet go dábálaš oahpahus.

Valle lea 29 jagi ja lávlu das mii dáhpáhuvvá sámi servodagas. Son rappe teknologiija birra, mii orru eanet aht` eanet stivreme olbmo. Ja luonddugáhttema birra, mii su mielas lea dehálaš.

Buot dán dahká sámegillii, maŋŋelgo fuomášii man buorre rappen-giella sámegiella duođai lea.

NRK2s čájehuvvui Ailu Valle portreahtaš juovlamánus diibmá. Dás oainnát dan sáddaga: 2014 maŋemus Árdna tv-sátta