NRK Meny
Normal

Áillohačča vuoigŋa veahkeha dáiddáriid

Lásságámmi, Áillohačča dállu Ivgobađas, lea geasuhan dáiddáriid dáiddalašbargguide, ja muhtimat leat maid vásihan ipmašiid doppe.

Lássagámmi Ivgovuonbađas

Áillohačča, Nils Aslak Valkeapää dállu 'Lásságámmi' Ivgobađas. Dáppe sáhttet dáiddárat ja dutkit bargat muhtin áigodagai háválassii. Máŋggas muitalit bargat bures dálus.

Foto: NRK

Lásságámmi, Áillohačča dállu Ivgobađas, lea geasuhan dáiddáriid maŋŋil go Lásságámmi ásahuvvui vuođđudussan. Romssa filkkagielda ja Norgga kulturdepartemeanta dat bidje ruđaid Lásságámmi vuođđudussii vai besse oasttit Áillohačča, Nils Aslak Valkeapää dálu, maŋŋilgo son eretvádjolii ja dállu bázii guorusin.

Dállu lea Nils Aslak Valkeapää dállu, maid son oaččui 50 jagi riegádanbeaivveskeaŋkan Omasvuona suohkanis.

Dállu, mii sulastahttá goađi, lea huksejuvvon lásisii Ivgobađa nannámii, danne gohčoduvvo dát Lásságámmin.

Vuođđudus dagai dálu dutkiid ja dáiddáriid dállun.

Ollugat leat dálostallan Lásságámmis go leat bargan iežaset dáiddalaš bargguid.

Laiti vásihii ahte Áillohaš ain lei dálus

Jenni Laiti

Dáiddár Jenni Laiti lea bealgoalmmat vahkku dálostallan Lásságámmis ovttas guvttiin eará dáiddárin. Son oinnii Áillohačča dálus, ja earátge dovde gamus ahte Áillohas lei doppe.

Foto: Stefan Karlsson/SVT Sápmi

Maiddái dáiddár Jenni Laiti lea leamaš bargamin Áillohačča dálus Ivgobađas. Son ja moadde eará dáiddára dálostalle Lásságámmis bealgoalmmat vahkku. Dán áigodagas vásihedje ahte Áillohaš lei dálus. Son oinnii maid Áillohačča čohkkámin ja geahččamin glásas olggos.

Earátge dovde gamus ahte son lei das sin gaskas. Álggos lei dát oalle somá, muhto de dovdagohte sii dan unohassan, go jurddašišgohte ahte son ii galggašii leat das sin gaskas.

Jenni Laiti lohká gal iežaset bargan hui bures Lásságámmis, de soittii Áillohačča vuoigŋa veahkehan sin bargat dan maid galge.

Dáiddár Geir Tore Holm

Dáiddár Geir Tore Holm muitala iežas bures bargan Lásságámmis, iige leat makkárge unohisvuođaid dovdan dálus.

Foto: Brita Åse Norlemann

Dáiddár Geir Tore Holm lea maid dálostallan Lásságámmis, iežas muitala erenoamaš bures bargan dálus, de son gal navdá Áillohačča vuoiŋŋas lei buorre bargat. Ja son áinnas vuolggášii fas Lásságámmii bargat, go doppe lei nu geahpas bargat dáiddalaš bargguid.