NRK Meny
Normal

Áillohačča eallinbargu čohkkejuvvo

Giellagas-instituhtta čoaggigoahtá Sámi kulturvuorkái iešguđetlágan materiála Nils-Aslak Valkeapää dahjege Áillohačča eallima ja karriera birra.

Nils-Aslak Valkeapää

Nils-Aslak Valkeapää dahje Áillohaš lei nugohčoduvvon máŋggasuorggat dáiddár. Son hommái sihke musihkain, govvadáidagiin ja diktačállimiin.

Foto: Ulrichsen, Rolf Chr. / Aftenposten

Áillohaš šattai dovddusin girječállin, govvadáiddárin ja sámi juoiganárbevieru ealáskahttimis ja ođasmahttimis.

Son bekkii sámekultuvrra bealušteaddjin miehtá máilmmi.

Áillohaš-čoakkáldaga rahpama gudnin Oulu universitehtas lágiduvvo seminára, mii gieđahallá Valkeapää eallinbarggu.

Seammás Sámi kulturvuorká bovde olbmuid skeŋket Áillohaš-materiála vuorkái.

Ulbmilin lea čoaggit viidát materiála Áillohačča eallinhistorjjás, dáidagis ja servodatlaš barggus.

(Čálus joatkašuvvá gova vuolábealde)

Nils Aslak Valkeapää

Nils-Aslak Valkeapää šattai dovddusin miehtá máilmmi go jagis 1994 rabai Lillehammera olympiijagilvvuid luđiin.

Foto: Greve, Jan / Scanpix

Čoakkáldagain hálidit seailluhit Áillohačča eallinbarggu čuovvovaš buolvvaide ja geavahit dán dieđu ovdamearkka dihtii dutkamii.

Seminára lágiduvvo Linnanmaan kampusis ihttin.

Jus hálidat skeŋket Áillohaš-materiála dahje jearrat skeŋkema birra, gažaldagaide vástida Sámi kulturarkiiva Oulu universitehta Giellagas-instituhtas.