NRK Meny
Normal

- Dego jáhpánlaš vuoiŋŋalaš luohti

Áillohaš rohkái mearkkašii jáhpánlaš kiso-bushi lávlon olu. Beaivváš Sámi Teáhtera neavttár, Iŋgor-Ántte Áilo Gaup lohká dán álbmotmusihka leat dego jáhpánlaš vuoiŋŋalaš luohtin.

Kiso-bushi konsearta
Foto: Mette Ballovara / NRK

Sápmelaš máŋggasuorggatdáiddáris Áillohaš dahje Nils Aslak Valkeapää rohkis ledje buorit oktavuođat Jáhpánii ja jáhpánlaš kultuvrii. Ja su mielas muittuhage kiso-bushi lávlonvuohki sakka sámi luođi. Dasa lea Beaivváš Sámi Teáhtera neavttár Iŋgor-Ántte Áilo Gaup ovttaoavilis. Son lei okta dain gii searvvai ovddetbeaivve Áillohačča gudnejahttineahkedii Oslos. Doppe guoimmuhedje sihke juoigit ja kiso-bushi lávlot.

Mohkohallet seammá láhkái go luođis

 

Iŋgor-Ántte Áilo Gaup
Foto: Mette Ballovara / NRK

- Jáhkán gáibmerohki (Áillohaš) livččii liikon dán konsertii. Sonhan láve ieš dáiguin juoiggadit ovttas ja son dovddai justa dáid olbmuid ja sin jođiheaddjiid. Áillohaš maid dovddai bures dán musihka, muitala Iŋgor-Ántte Áilo Gaup maŋŋá konseartta. Sápmelaš neavttár lohká kiso-bushi lávlonmálle sakka sulastahttit luođi.

- Sin lávlonmálle gal sulastahttá luođi sakka ja mo sii mohkohallet, hervejit jienain ja šuoŋat maid, čilge Iŋgor-Ántte Áilo Gaup.

Áillohaš livččii iešge searvan

 

Junichiro Okura
Foto: Mette Ballovara / NRK

Junichiro Okura lei Áillohačča verdde go sápmelaš máŋggasuorggatdáiddár láve Jáhpánis fitnat. Dál Okura orru Helssegis ja doppe son lohkáge iežas vuosttaš geardde deaivan Áillohačča jagis 1988. Ja dalle son bovdiige Áillohačča lohkat divttaidis suopmelaš diktaeahkedis Tokyos. 

Okura navdá, ahte Áillohaš rohki livččii liikon ievttá gudnejahttoneahkedii. - Áillohaš livččii navdimis iešge hálidan searvat dákkár eahkedii gos luohti ja kiso-bushi gullo, diehtá Okura.

Okura lei gullan Áillohaččas, ahte luohti ja kiso-bushi nu olu sulastahttet nubbi nuppi. Dasa son ii lean ovdal jáhkkán, muhto dál son de gulai man duohta dat lea.

Gula jearahallama