Aili mánnávuođa geasseparadiijas

Sámediggepresideanttas lea erenoamáš gullevašvuohta Gussanjárgii. Danne lei sutnje stuorra gudni rahpat Gussanjárggabeivviid.

Aili Keskitalo

MOJOHALLÁ: Sámediggepresideanta Aili Keskitalo rabai ikte Gussanjárggabeivviid. Dalle son maid muitalii man mávssolaš báiki Gussanjárga sutnje lei dalle go son lei unni.

Foto: Piera Balto / NRK

Aili Keskitalo

Aili Keskitalo.

Foto: Piera Balto / NRK

– Mu eatni beale sogas lea dáppe geasseorohat. Mu áhkus, Čiskke Elles (Elen N. Guttorm), lei barta moadde kilomehtera Gussanjárggas eret, doppe Áttánguolbanis. Dalle láviimet mii dáppe geasset, muitala Aili Keskitalo.

Dál orrut Gussanjárggas dušše sullii 20-25 olbmo, muhto ovdal lei olmmošlohku sakka stuorát.

– Gussanjárga lei dalle dáppe dat čoahkkebáiki. Dáppe lei buvda ja mun muittán hui bures, ahte munnje dat stuorámus dáhpáhus munnje lávii go mii deike vulggiimet. Dalle rávisolbmot oste midjiide mánáide lákcajieŋa, muittaša Keskitalo.

– Álo čáppa dálki

Gussanjárggabeaivvit lágiduvvojit dán vahkkoloahpa guđát geardde. Almmolaš rahpan lei ikte, ja sámediggepresideanta lei bovdejuvvon doallat rahpansártni.

– Mánnán lei munnje hui stuorra dáhpáhus boahtit deike Gussanjárgii buvdii. Dat lei munnje dego boahtit gávpogii, čilge Keskitalo.

Publikum, Kunesdagan 2019, Gussanjárggabeaivvit 2019

Moaddelogi olbmo ledje čoagganan gullat Aili Keskitalo rahpansártni, mii dollui Gussanjárgga boares skuvllas.

Foto: Piera Balto / NRK

Sártnistis Keskitalo čilgii, ahte Gussanjárga lei dego su mánnávuođa paradiijas.

– Nugo mun muittán dan dál, de lei álo čáppa dálki dáppe, ja de lei suohtas leat ovttas oarbmeliiguin ja vilbeliiguin. Mii láviimet stoahkat doppe Áttánguolbanis. Mii manaimet Lágesduoddarii oaggut ja murjet, muitala Keskitalo.

Sámediggipresideanta lohká, ahte oassi su váimmus gullá Gussanjárgii.

– Mus leat hirbmat olu buorit muittut dáppe.

– Ilus vásihit Gussanjárggabeivviid

Rávisolmmožin ii leat Keskitalo leamaš seammá dávjá Gussanjárggas go mánnan.

– Dál láven bisánastit go lean guovllus. In láve dađibahábut juohke geasi fitnan dáppe, muhto mu fulkkiin leat ain bohccot Lágesduoddaris. Danne finan dáppe go de lea liiba, čilge son.

Mánnávuođamuittuidis son navdá doalahit nu guhká go eallá.

– Álo go deike boađán de muittán buot iežan vásáhusaid, muhto maiddái buot daid muitalusaid maid eadnán lea munnje muitalan go ledjen mánná, muitala Keskitalo.

Keiino på Kunesdagan

Keiino lei duorastaga konseartta váldogeasuheaddji. – Munnje lea erenoamáš suohtas beassat dán joavkku beassat gullat. Sin luođit ja lávlagat gudnejahttet Sámi ja kultuvrramet, lohká Keskitalo.

Foto: Aili Keskitalo / Privat

Mo orrut Gussanjárggabeaivvit?

– Mun in leat fitnan dáppe ovdal dáid doaluid oktavuođas. Juohke geasi go oainnán dáppe lágidit dáid riemuid, de lea mus šaddan hui miella dáppe fitnat. Danne lean ilus go dál ožžon vejolašvuođa rahpat dáid doaluid. Dat lea stuorra gudnin munnje, čilge Aili Keskitalo ja mojohallá.