Denali nama leat Alaska álgoálbmogat guhka juo geavahan, ja lei USA luohpi Presideanta, Barack Obama, guhte válljii Denali nama, danin go dat namma geavahuvvo Alaska álgoálbmogiid gaskkas.
Golleroggi bijai nama
Mount McKinley nama lei muhtun golleroggi guhte bijai nama Mount McKinley dán várrái jagi 1886, go gulai ahte Ohio gávpoga ássi ja republihkalaš bellodaga politihkar, William McKinley dalle lei vuoitán republihkalaš bellodaga nominašuvdnaválggaid.
Vári álgonamma
Alaska 42 Athabascan čearddaid ovttastusa presideanta, Victor Joseph, dadjá ahte sii guhka leat dáistalan oažžut dohkkehuvvot Denali nama 6.194 alla várrái.
Sii leat nu guhka bargan dan badjelii ahte vári álgoálbmotnamma dohkkehuvvo, ja danin dat ii berre dál fas rievdaduvvot dien amas nammii, dadjá Victor Joseph.
Eaddudit álgoálbmogiid
Son dadjá ahte dalle go namma rievdaduvvui eret Danali namas Mount McKinley nammii, de dat gal eaddudii ja loavkašuhtii riikka álgoálbmogiid.
Jus vári namma dál fas galgá rievdaduvvot, de dat gáibida ahte presideanta ovddida nammarievdadan ávžžuhusa USA kongressii.
