Marianne Pentha namma beaggigođii viidát maŋŋil go son jagi 2012 lei mielde TV2 musihkaguoimmuhanprográmmas The Voice jagi 2012. Son muitala garrasit bargan dan rájes, mii dál lea ávkin sutnje go galgá NRK geasse-TV sáddagis lávlut.
– Mun lean bargan olu, maiddái ovdal The Voice musihkkaguoimmuhanprográmma. Mun lean bargan olu vai beasan deike ja daid vásáhusaid maid ožžon The Voice prográmmas lea maid veahkehan olu go galggan leat TV:s njuolgga mielde juohke beaivvi, dadjá Pentha.
Boahtteáiggis áigu Pentha eanet lávlut sámegillii.
– Sámi musihkain bargagoađán mun eanet dán čávčča. Mun lean vuolgime Bådåddjui, gos mus leat konseartat. Mun áiggun maid doppe hárjehallat ja báddet ođđa musihka, muitala son.
Dovda gullevašvuođa sápmái
Marianne Pentha čilge ahte son dovdá ahte sus lea gullevašvuohta sámi servodahkii ja sámi kultuvrii.
– Mus lea hui gullevašvuohta sápmái, mun lean bajásšaddan Os báikkis, Østerdalenis, mii lea láhka Plaassje, lulli Trøndelágas. Mu áhčči lávii hubmát sámegiela iežas vieljaiguin ja mii finaimet sin guossis go sii eai orron nu guhkkin mis eret. Nu ahte mun lean gullán sámegiela hui olu ja mis lei dakkár sámileaira juohke geasi vel. Mis ledje maid bohccot olggobeale viesu ja mus lei maid gákti. Mun lean álo dovdan iežan sápmelažžan, muitala son.
Muhto Guovdageainnus ii fitnan son ovdal go jagi 2005:s.
– Ollesolmmožin vulget mun easka jagi 2005:s Guovdageidnui beassážiid, ja dat lei hirbmat somá. Mii deaivvaimet fulkkiid geaid birra mii eat diehtán ge ja dat lei somá, dadjá Pentha.
Ii leat goassege oahppan sámegiela
Marianne Pentha ii leat goassege oahppan hubmát sámegiela, muhto go son deaivvai sámi gitarista Jon Kåre Hansen, de hásttii son vuolgit mielde lávlut Áillohaš rohki divttaid sámegillii masa soai leaba bidjan musihka.
– Mun vulgen su mielde ja mun lean juo muhttin lávlagiid lávlon sámegillii. Mun áiggun mátkkoštit dál, ja de besset olbmot gullát mu lávlumen sámegillii, dadjá son.
Marianne Pentha muitala ahte Jon Kåre Hansen diđii ahte son ii hálddaš sámegiela, muhto lei vissa dat mii dárbbašuvvui vai son beasai badjel dan cakki ahte duosttat hubmát sámegiela.
– Moai letne boahtte jagi guovvamánus johtimen Davvi-Norggas, ja dalle beasat gullát mu lávlumen sámegillii. Mun geahččalan oahppat sámegiela Áillohaš rohki divttaid bokte, ja mus lea gudneballu. Mu mielas lea nu čáppa giella ja lea váttis gávdnat daid rievttas sátnejienaid, vai gullo auteanttalaččat. Vaikko lean gullán olu sámigiela, de mun ražan dainna ahte giella lea njuovžil, dadjá son.
Ja vaikko Marianne Pentha mielas lea váttis hubmát sámegiela, de lea sus goit ge mihttu maid háliida oláhit.
– Mun dovddán ahte lean rievttes geainnus, go lean oahppamen sámegiela. Dál ferten dušše oahppat eanet vai beasan hubmát ja lávlut sámegilliii, muitala son.
- Guldal ášši:
