Áigu bearráigeahččat Guovdageainnu
Finnmárkku fylkkamánni áigu čađahit bearráigeahču Guovdageainnu suohkanis, maŋŋel go lea gullan ahte mánáidskuvla lea ásahan njeallje beaivvi skuvlavahku vuosttaš luohká rájes gitta viđat luohká ohppiide.
Fylkkamánnu áigu diehtit leago dáin ohppiin rivttes oahppodiibmolohku. Dan dihte lea bivdán suohkanis duođaštusaid dán ektui ovdal dán mánu 11. beaivvi. Jus čájehuvvo ahte suohkan lea rihkkon lága, de ferte jođánit dán dili njulget. Bearráigeahču mihttu lea nannet skuvlaruvttu.