Áigot nannet sámi oahppofálaldaga
Bearjadaga dán vahkus almmuha ráđđehus ođđa stuorradiggedieđáhusa sámi giela, kultuvrra ja servodaga birra.
Váldoášši das lea sihkkarastit sámi mánáide buoret sámegiel oahpahusa ja doarvái sámegieloahpaheaddjiid.
Ođđa dieđáhusas maid vuosttaš geardde čilgejuvvo man garrasit sámi vánhemat ieža gártet rahčat sámegieloahpahusa ovddas miehtá Norgga ja ahte olu sámi mánát eai oaččo sámegiel oahpahusa maid sis livčče riekti oažžut.
Norgga Máhttoministtar Tonje Brenna áigu ođđa dieđáhusain buoredit dili.
– Ráđđehus dáhttu sihkkarastit ahte eanet mánát ožžot sámemánáidgárde fálaldaga, ja ahte eanet sámi mánát válljejit sámegieloahpahusa skuvllas. Livčče dehálaš ahte eanet sámemánát lohket sámegiela joatkkaskuvllas, vai eanebut de maid beasašedje sámi oahpaheaddji ohppui, ja beasašedje maid válljet eará sámi oahpuid, lohká Brenna.
Son lea duđavaš go sii leat Sámedikkiin soahpan áššis.
– Ná de nannešeimmet sámi gielaid ja sámi identitehta . Lean ilus go Sámedikkiin leat ovtta oaivilis das movt dálá dilli lea. Dál sáhttit ovttas njulgegoahtit daid váilevašvuođaid ja vuoruhit daid dárbbuid mat leat oahpahussuorggis, lohká Brenna.
Sámedikki mielas lea dehálaš ahte Stuorradikki dieđáhusas dál viimmat čilgejuvvo makkár duohta dilli sámi bearrašiidda lea miehtá Norgga, go gártet rahčat sámegieloahpahusa ovddas.
Dál go ráđđehus ge lea ádden movt dilli duođaid lea, de lea vejolaš njulget dili, oaivvilda Sámediggepresideanta Silje Karine Muotka.
– Dál lea doaivva ahte šaddá albma čuovvoleapmi ja Sámedikki ulbmil lea ahte sámi vánhemat ja sámi mánát eai galgga rahča juohke jagi, ja masá beaivvis beaivái sihkkarastit dan mii lea mánáid vuoigatvuohta oahpahuslága ektui ahte, nammalasi buorre sámegieloahpahusa, lohká son.
Muotka maid deattuha ahte stuorradiggedieđáhus dieđusge galgá čuovvoluvvot konkrehta doaibmabijuin, vai sámemánáid oahppofálaldat buorrána ja vai sámi oahpaheaddjiid lohku lassána.
– Dát maid dieđusge eaktuda lasi ekonomalaš návccaid ja olu eará doaimmaid go dieđáhus galgá čuovvoluvvot, lohká son.
