– Livččii buorre jus boađášii mánáidlávlunáppa sámegillii, lohká guovtti máná eadni Kaisa Hjelløkken.
Sus lea čiežajahkásaš nieiddaš ja bártnáš gii lea fargga njeallje jagi. Ja goappašagat liikoba lávlut álkkes mánáidlávlagiid.
Riggodahttit nuoramusaid giela
Storm Films As lea ohcan Sámedikkis doarjaga jorgalahttit dán áppa davvisámegillii. Oktibuot lea fitnodat ohccán lagabui 200.000 duhat ruvnno jorgaleapmai.
Prošeaktajođiheaddji Janicke Paus Hellebust lohká ahte okta sámi eadni jearai Facebookas eaigo sii sáhte jorgalit áppa sámegillii.
– Ja min mielas gal galget sámimánát nai beassat dán «lávllagirjji» guldalit iežaset gillii, lohká son.
SYNG-mánáidáppa leat olbmot viežžan App Stores badjel 25.000 geardde. Ja statistihkkareaiddus App Annies boahtá ovdan ahte juste dál lea dárogiel SYNG-áppa goalmmádin bajimusas mánáidáppalisttus Norggas.
Áppa lea hábmejuvvon govvagirjin. Go deaddila muhtin eallái, de álgá dat lávlut dovddus mánáidlávlagiid nugo ovdamearkka dihte Bea, bea lábbážan dahje Seave seave násttážan.
Hellebust muitala ahte sis lea ovttasbargu sámi artisttain Ella Marie Hætta Isakseniin.
– Ja son dat galgá lávlut dáid lávlagiid.
Son muitala nai ahte sii eai daga dán ruđa dihte, go ii dáidde nu stuora márkan sámegiel áppaide.
– Mii leat jurddašan veahá iežamet servvodatovddasvástádusa birrá. Ja dannego áppaid lea hui somá ráhkadit, muhto lea heajos dienas, lohká prošeaktajođiheaddji.
Speallu lea ráhkaduvvon nuoramus mánáide gitta 3-jahkásaččaid rádjai ja doaibmá giellaoahppanspeallun nuoramusaide.
Suovašii eanet stoahkat telefovnnain
Deanu nieida Kaisa Hjelløkken muitala ahte sii geavahit muhtin sámi áppaid ruovttus, muhto sis leat rájit man guhká hávális máná guovttos beassaba speallat telefovnnain ja iPadain.
– Suovašin iežan máná guovtto stoahkat eanet iPadain jus livčče eanet sámegiel áppat. Go lea dehálaš ahte soai oaidniba ahte sámegillii nai gávdnojit somás áppat. Dál leat hui olu mánáidáppat dárogillii ja eŋgelasgillii ja sámegiella jávká veaháš, lohká son.
Jus lihkostuvvá nugo leat jurddašan, de almmuhit sámegiel áppa juovlamánus.
Loga nai: